"გემო ფესტის" წლევანდელ ღონისძიებაში მონაწილეობას ვეღარ მიიღებს კიდევ ერთი მსურველი, ეკა ხუტკუბია, რომელიც ჩირის მწარმოებელი კომპანიის დამფუძნებელია. ამის შესახებ ინფორმაციას ის საკუთარ ფეისბუქ გვერდზე აქვეყნებს. 

მისი განმარტებით, ორგანიზატორებმა ორი მიზეზი დაუსახელეს, უთხრეს, რომ ის ცნობილი სახე იყო და ამასთან, ბიუჯეტის შემცირება უწევდათ, რაც მონაწილეების მოხსნის ერთ-ერთი საფუძველი იყო.

"განაცხადი შევავსე. იყო ოთხი მიმართულება და ამ ოთხი მიმართულებიდან შევარჩიე კვების ზონა, რადგან მინდოდა ამ მიმართულებით გამეცნო ჩემი შესაძლებლობები იქ მოსული სტუმრებისთვის. ყველა ჩანიშნული შეხვედრა გავიარე შეფებთან და დავიწყე მზადება. მოვამზადე გასატანი პროდუქციის ძირითადი ნაწილი.

ორი დღის წინ რაღაც დეტალის გასარკვევად დავრეკე და მეუბნებიან, რომ სამწუხაროდ თქვენ ვერ მიიღებთო მონაწილეობას ჩვენს ღონისძიებაში. ერთი მიზეზი იყო, რომ ცნობილი სახე ვიყავი, რომ მქონდა საწარმო და ჩემი საჭიროება არ ითხოვდა იქ ყოფნას. მეორე მიზეზი იყო ის, რომ მათ შეუმცირეს ბიუჯეტი და ამ მიზეზებით მოუწიათ მონაწილეების განახევრება. გამომდინარე აქედან, არც ერთი მიმართულებით არ მაქვს შესაძლებლობა მივიღო მონაწილეობა", - აღნიშნავს ის.

შეგახსენებთ, 8-9 სექტემბერს დაგეგმილ ფესტივალში მონაწილეობას ვერ მიიღებენ საოჯახო მარანი "ოდა" და ლიკა როგავა.

საქართველოს ტურიზმის ეროვნული ადმინისტრაციის ინიციატივით დაფუძნებული "გემო ფესტი" ზუგდიდში 7 – 8 სექტემბერს გაიმართება. ორგანიზატორებით თქმით, პროექტის მიზანია რეგიონებში გასტრონომიული ტურიზმის ხელშეწყობა, ადგილობრივი სამზარეულოს პოპულარიზაცია, მეწარმეების/ოჯახების წახალისება, შიდა და საერთაშორისო ტურიზმის სტიმულირება.