ზუგდიდის მუნიციპალიტეტის მერია ქალაქის ცენტრალურ მოედანზე ღონისძიებების ორგანიზებისთვის 93 870 ლარს დახარჯავს. შესაბამისი ტენდერი სახელმწიფო შესყიდვების ვებ გვერდზე უკვე გამოცხადებულია.

სატენდერო დოკუმენტაციის მიხედვით, დაგეგმილია კულტურული და სხვადასხვა სანახაობრივი აქტივობა, მათ შორის ახალი წლის ღამეს გალა კონცერტი და საშობაო ალილოს კოსტიუმირებულ მსვლელობა.

„საკონცერტო პროგრამის ხანგრძლივობაა მინიმუმ 90 წუთი. 12 საათამდე რამდენიმე წუთით ადრე სცენიდან ქალაქის მერი თანაქალაქელებს მიულოცავს ახალი წლის დადგომას. კონცერტი დასრულდება გრანდიოზული ფეიერვერკით“, - ვკითხულობთ ინფორმაციაში.

სატენდერო პირობების თანახმად, გამარჯვებულმა პრეტენდენტმა, 31 დეკემბერს, საახალწლო გალა-კონცერტისთვის უნდა უზრუნველყოს საკონცერტო სცენის გაფორმება ლედ მონიტორით, გახმოვანების და განათების აპარატურით, ასევე, სადღესასწაულო ფეიერვერკების მოწოდება-გაშვების მომსახურება და ზუგდიდის მერიის „facebook“ გვერდზე ღონისძიების ლაივ- რეჟიმში ტრანსლაცია. გარდა ამისა, მომსახურება ითვალისწინებს 7 იანვარს, ხარში შებმული სადღესასწაულოდ მორთული ურმების ან/და ცხენშებმული ორთვალას, ასევე, ბაირაღების ორგანიზებას.

ტენდერში წინადადებები 26-დან 29 დეკემბრის ჩათვლით მიიღება. პრეტენდენტი კი ვალდებული იქნება, 2024 წლის 31 დეკემბრიდან 2025 წლის 7 იანვრის ჩათვლით შეასრულოს ხელშეკრულებით გათვალისწინებული სამუშაოები.

ცნობისთვის, გასულ წელს, ამავე ტიპის ღონისძიებებისთვის მუნიციპალიტეტის ბიუჯეტიდან 86 840, ანუ 7 030 ლარით ნაკლები დაიხარჯა.