ზუგდიდის მუნიციპალიტეტის მერია ბენეფიციარებისათვის საახალწლოდ 37 785 ლარის ღირებულების პროდუქტებს შეისყიდის.

სატენდერო დოკუმენტაციის მიხედვით, პროდუქტები გათვალისწინებულია მრავალშვილიანი ოჯახების, მეორე მსოფლიო ომში მონაწილე ვეტერანების (ადგილობრივი და დევნილი), მარტოხელა მშობლების, დედ-მამით ობოლი ბავშვების, 100 წელს გადაცილებულების, უკიდურესად შეჭირვებული ოჯახების, უფასო სასადილოსა და სოციალური საცხოვრისის ბენეფიციარებისთვის.

ამა ცნობით, ტენდერში გამარჯვებულმა პრეტენდენტმა 550 ცალი სასაჩუქრე პაკეტი უნდა მოამზადოს, რომელშიც მოთავსებული იქნება:

2 ცალი შესქელებული რძე, 2 პაკეტი შაქარი, 2 ცალი ნაღების კარაქი, 1 პაკეტი კარამელი, 1 ბოთლი ლიმონათი, 1 ქილა თაფლი, 2 ყუთი კვერცხი, 1 პაკეტი ფქვილი, 1 პაკეტი მაკარონი, 1 ბოთლი რძე, 1 ვაფლის ტორტი, 1 პაკეტი წიწიბურა, 1 კოლოფი შავი ჩაი, 1 პაკეტი ბრინჯი, 1 გაყინული ქათამი.

ტენდერში წინადადებები 26-დან 28 ნოემბრის ჩათვლით მიიღება. გამარჯვებული კომპანია ვალდებული იქნება ხელშეკრულების დადებიდან 2024 წლის 26 დეკემბრამდე უზრუნველყოს მომსახურების გაწევა.

შეგახსენებთ, გასულ წელს, ამავე ტიპის შესყიდვისთვის ადგილობრივი ბიუჯეტიდან 53 570, ანუ 15 785 ლარით მეტი გამოიყო.