ასოციაცია „ათინათი“ განცხადებას ავრცელებს, რომლითაც საქართველოში მიმდინარე მოვლენებს ეხმიანება:

„ათინათელები“ 30 წელია ზუგდიდში აგურ-აგურ ვაშენებთ სამოქალაქო საზოგადოებას, ვცდილობთ დავეხმაროთ ახალგაზრდებს განვითარებაში, დავნერგოთ დემოკრატიული ფასეულობები, დაპირისპირებულ მხარეებს შორის აღვადგინოთ ნდობა და უკეთესობისკენ შევცვალოთ ჩვენი საზოგადოების ყოფა.

ჩვენმა გუნდმა საკმაოდ რთული 30 წელი გამოიარა, რომელიც სავსეა წარმატებებით, გამოწვევებით, გამოცდილებით და დღეს უკვე ვხედავთ იმ ხელშესახებ შედეგს, რაც ჩვენმა დაუღლავმა შრომამ მოიტანა.

„ათინათმა“ უამრავი ადამიანის ცხოვრება ძირეულად შეცვალა უკეთესობისკენ. ეს ყველაფერი გაკეთდა და კეთდება ჩვენი ევროპელი და ამერიკელი პარტნიორებისა და მეგობრების დახმარებით!

ჩვენ გვწამს და გვჯერა, რომ საქართველო მისი ისტორიით, რელიგიით, კულტურით და ტრადიციებით არის ევროპის ნაწილი და ის ევროპული ოჯახის ღირსეულ წევრობას გაწევს!

ამიტომ, ჩვენ ვემიჯნებით საქართველოს მთავრობის 28 ნოემბრის განცხადებას, რომელიც საბოლოოდ გვიჭრის ევროინტეგრაციისკენ მიმავალ გზას, რაც ქართველი ხალხის, არასამთავრობო ორგანიზაციების და სამოქალაქოს საზოგადოების დიდი შრომის ფასად იქნა მიღწეული.

საქართველოს ადგილი ევროპაშია!“, - ვკითხულობთ განცხადებაში.

შეგახსენებთ, რომ, საქართველოს მასშტაბით, მოქალაქეების ნაწილის პროტესტი მოჰყვა „ქართული ოცნების“ გადაწყვეტილებას, 2028 წლის ბოლომდე საქართველო ევროკავშირთან მოლაპარაკებების გახსნის შეჩერების შესახებ.