ზუგდიდში უწყვეტი პროტესტი გრძელდება, 17 საათიდან, მოქალაქეები ისევ შეიკრიბნენ ქალაქის ცენტრში, სახელმწიფო რწმუნებულის ადმინისტრაციის შენობის წინ.

ადგილზე იმყოფებიან სხვადასხვა თაობის ადამიანები, სამოქალაქო სექტორის, არასამთავრობო როგანიზაციების, ოპოზიციური პარტიების წარმომადგენლები, სტუდენტები და აბიტურიენტები.

მათ, ტრადიციულად, ხელში უჭირავთ საქართველოს და ევროკავშირის დროშები, ბანერები, ასევე აქციების დარბევისას დაშავებული ადამიანების, მათ შორის ჟურნალისტების, ფოტოები.


თავისუფლება რეჟიმის პატიმრებს და ხელახალი სამართლიანი არჩევნები, ეს არის ორი მთავარი მოთხოვნა, რომელიც ისმის აქციაზე.

„ჩვენ ნადმვილად არ დაგვღლის ქუჩაში დგომა. სწორ მხარეს ვდგავართ, სწორი და მართალია ჩვენი ბრძოლა და აუცილებლად, გამარჯვებით დავასრულებთ. უკან წავაღებინებთ რეჟიმს იმ კანონებსაც, რომელთა აღსრულება ხდება ზუგდიდშიც, როდესაც რაღაც ქუდის ტარების გამო ჩვენს თანამებრძოლებს აჯარიმებენ, საქმეები აღძრეს მათ წინააღმდეგ, ადმინისტრაციული სამართალდარვევის კუთხით. ჩვენ გვინდა, რომ ეს აბსურდი ერთხელ და სამუდამოდ დავასრულოთ და არავის ამ ქვეყანაში, არც მოსამართლეებს, არც პოლიციელებს, არც საჯარო მოხელეებს, არავის არ უწევდეს უსამართლი კანონების საკუთარი ნების საწინააღმდეგოდ შესრულება“, - უთხრა შეკრებილებს აქციის ერთ- ერთმა ორგანიზატორმა არჩილ თოდუამ.


ადგილზე მობილიზებული სამართალდამცავების წინ მჯდომარე პროტესტი გამოხატა აქციის მონაწილე შალვა ესართიამ, ცოტა ხნის წინ ძალაში შესული კანონების წინააღმდეგ, რომლებიც, მანიფესტაციების მონაწილეებისთვის სახის დაფარვას კრძალავს. მას გუშინ, 9 იანვარს აქციის მსვლელობისას, სამართალდამცავებმა მოსთხოვეს, სახეზე შემოხვეული შარფი ჩამოეწია და სახე გამოეჩინა.

„არალეგიტიმური კანონებია ამ პროტესტის მიზეზი, ერთ - ერთი მათგანია პირბადის აკრძალვა, რომელსაც ხელი მოაწერა არალეგიტიმურმა პრეზიდენტმა მიხეილ ყაველაშვილმა და რა თქმა უნდა, ჩვენ ამას არ ვეთანხმებით და გავაპროტესტებთ ყოველთვის. გუშინ, როგორც ასეთი, ჩემთვის პირადად დაჯარიმების ფაქტი არ უთქვამთ, მაგრამ, სავარაუდოდო, ვფიქრობ, რომ დამიკავშირდებიან უახლოეს დღეებში და ალბათ სასამართლოში დამიბარებენ. როგორც ამბობენ კულუარებში, დაჯარიმებული ხარო, ამბობენ“, - უთხრა მან რადიო „ათინათს“.


მანამდე, თავსაბურავის, ე.წ. ბალაკლავას ტარებისთვის, რამდენჯერმე დააჯარიმეს აქტივისტები, მარიამ სიჭინავა და კერენ ესებუა.


სიტყვით გამოსვლისას, ორგანიზატორებმა განაცხადეს, რომ ხვალინდელი აქცია ოდნავ განსხვავებულ ფორმატში ჩატარდება და 14 საათზე დაიწყება. 11 იანვარს ზუგდიდში პროტესტის მონაწილეებს საქართველოს მე-5 პრეზიდენტი სალომე ზურაბიშვილი შეუერთდება.