ზუგდიდის რაიონულ სასამართლოსთან "ერთიანი ნაციონალური მოძრაობის" მხარდამჭერები და ყოფილი პოლიციელები, დავით ყოლბაია და ლევან გოგია მივიდნენ, სადაც მათ წინააღმდეგ დაწყებული სასამართლო დავა გააპროტესტეს.

მათი თქმით, გამოძიება 166-ე და 173-ე მუხლებით მიმდინარეობს, რაც საზოგადოებრივ ადგილებში შეურაცხყოფას და პოლიციის კანონიერი განკარგულებისადმი ან მოთხოვნისადმი დაუმორჩილებლობას გულისხმობს.

კერძოდ, ყოლბაია და გოგია ამბობენ, რომ გამოძიება მათ სოციალურ ქსელში შსს-ის მაღალჩინოსნების მიმართ შეურაცხმყოფელი განცხადებების გაკეთებას ედავება, რაც, მათი თქმით, სიმართლეს არ შეესაბამება და ბრალდებაც პოლიტიკური მოტივითაა განპირობებული.

" ჩვენ წინასაარჩევნო პროცესებში აქტიურად ვმონაწილეობდით. გამოვავლინეთ არაერთი სისხლის სამართლის დანაშაული, მათ შორის, პირადობების მიმართულებით. არჩევნების შემდგომ ვიყავით და ვართ საპროტესტო აქციების აქტიური მონაწილეები. მათ გადაწყვიტეს, რომ ჩვენს მიმართ გაატარონ ისეთი სახის ღონისძიებები, რაც რუსეთში ხდება. მედავებიან ფეისბუქ პოსტის განთავსებას, სადაც შეურაცხმყოფლად მოვიხსენიებ შსს-ის მაღალჩინოსნებს.

იმ პირობებში, როდესაც ისინი ძალადობენ აქციის მონაწილეებზე თბილისში და სხვაგან, რთულია, პოლიციელები კარგად მოიხსენიონ, თუმცა მე მსგავსი ტიპის კომენტარი და პოსტი არ გამიკეთებია. თვითონ უნდა ამტკიცონ ეს", - ამბობს დავით ყოლბაია.

ლევან გოგია კი დასძენს, რომ მათი სოციალური ქსელის ანგარიში, სავარაუდოდ, გატეხეს და იქ შეურაცხმყოფელი შინაარსის პოსტები გამოაქვეყნეს, რომელსაც ახლა ბრალდებულების წინააღმდეგ აქვეყნებენ.

"მათ იცოდნენ ჩვენი საქმიანობის შესახებ, რომ ვიყავით ოპოზიციური პარტიიდან არჩევნების პროცესში ჩართული და უნდათ, გამოიყენონ დისკრიმინაცია და რეპრესიები. თავიანთ ხელშია, პროკურატურა, სასამართლო, შსს და როგორც უნდა ისე მართავენ ორგანოებს. რასაც გვედავებიან, არის ფარსი, თვითონ შეთითხნეს და მოიგონეს. ჩვენივე სურათებით ახალი გვერდები შექმნეს, თუ ჩვენ გაგვიტეხეს სოციალური ქსელები და იქიდან შეურაცხმყოფელი წინადადებები დაწერეს, რასაც ახლა ჩვენს წინააღმდეგ იყენებენ. ამას მტკიცება სჭირდება. მე ფეისბუქმა არაერთხელ მომწერა, რომ ჩემს გვერდზე ცდილობდნენ შემოღწევას. არ ვაღიარებ აღნიშნულს.

გარდა ამისა, რამდენიმე დღის წინ, ქუჩაში შემხვდა უცნობი ადამიანი და მითხრა, თუ ქვეყანას არ დავტოვებ, დამიჭერენ. ამის შესახებ სპეციალურ საგამოძიებო სამსახურს უკვე მივმართე. გუშინაც, ერთ-ერთმა მაღალჩინოსანმა გაიმეორა იგივე. მე არ ვაპირებ ქვეყნის დატოვებას, ცხადია", - ამბობს გოგია.

აღნიშნულ საქმეზე ზუგდიდის რაიონულ სასამართლოში პროცესი დღეს უნდა გაიმართოს, რომელსაც მოსამართლე გვანცა ვარდანიძე გაუძღვება.