ზუგდიდში, პროტესტის 64 - ე დღეს, მოქალაქეები ისევ შეიკრიბნენ სახელმწიფო რწმუნებულის ადმინისტრაციის შენობასთან.

მათი მოთხოვნები უცვლელია, რეჟიმის პატიმრების გათავისუფლება და ხელახალი სამართლიანი არჩევნების დანიშვნა.

შეკრებილებს შორის დღეს არ იმყოფებოდა ზუგდიდის პროტესტის მედროშედ ცნობილი შალვა ესართია. უფრო ადრე „დროას“ აქტივისტის მარიამ სიჭინავას მიერ გავრცელებული ინფორმაციით, ის სამართალდამცავებმა დააკავეს.

აქციის ერთ - ერთი სპიკერის, არჩილ თოდუას თქმით, როგორც მათთვის ცნობილია, ესართია ფოთის წინასწარი დაკავების იზოლატორშია გადაყვანილი. მისივე ცნობით, ადვოკატს არ მიეცა მისი ნახვის საშუალება და ჯერჯერობით არ არის დაზუსტებული რა სამართალდარღვევას ედავებიან ზუგდიდელ აქტივისტს.

გამომსვლელებმა და შეკრებილებმა სოლიდარობა კიდევ ერთხელ გამოხატეს მზია ამაღლობელის მიმართ, რომელიც მე - 19 დღეა შიმშილობს პატიმრობაში.

ისმოდა შეძახილები: „თავისუფლება მზია ამაღლობელს“, „თავისუფლება შაკოს“, „არ იქნება სამართალი, არ იქნება მშვიდობა“, „ცეცხლი ოლიგარქიას“.

ასევე, როგორც, სხვა დღეებში, ადგილზე მიიტანეს საქართველოს და ევროკავშირის დროშები, მათ შორის, ის დროშები, რომლებიც ამ დღეების განმავლობაში ხელში ეჭირა შალვა ესართიას.

შეკრებაზე, თბილისსა და რეგიონებში მიმდინარე მოვლენების განხილვისას, საუბარი ასევე შეეხო PACE - ს მიერ გუშინ მიღებულ რეზოლუციას, რომლის თანახმადაც, საპარლამენტო ასამბლეა მოითხოვს, რომ "ქართულმა ოცნებამ" მიმდინარე წლის აპრილამდე ხელახალი საპარლამენტო არჩევნები დანიშნოს და პოლიტპატიმრები გაათავისუფლოს. რის შემდეგაც, "ქართული ოცნების" წევრმა თეა წულუკიანმა მალევე განაცხადა, რომ ასამბლეაში თავად წყვეტენ მუშაობას, რადგან დოკუმენტის დათქმები მიუღებელია მათთვის.

შეგახსენებთ, 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს. ამ დღიდან საქართველოს სხვადასხვა ქალაქში პერმანენტული პროევროპული საპროტესტო აქციები იმართება.