აფხაზეთის დე ფაქტო რესპუბლიკის ახალი რუსი კურატორის, სერგეი კირიენკოს თქმით, მნიშვნელოვანია, რომ სოხუმის აეროპორტი მიმდინარე წლის 1 მაისამდე ამოქმედდეს, ხოლო სატესტო რეისი კი თებერვალში შესრულდეს.
„იმისთვის, რომ სეზონისთვის რუსეთის სხვადასხვა რეგიონიდან აეროპორტში სრულფასოვანი ფრენები განვახორციელოთ, პირველი სატესტო რეისი თებერვალში უნდა მივიღოთ“, - თქვა რუსეთის პრეზიდენტის ადმინისტრაციის აპარატის უფროსის პირველმა მოადგილემ.

კირიენკომ აღნიშნა, რომ აეროპორტი დამატებით შესაძლებლობებს გაუხსნის როგორც „აფხაზეთის მოქალაქეებს“, ასევე რუს ტურისტებს.

მისი თქმით, ინვესტორები უკვე ფიქრობენ სამომავლოდ მის გაფართოებაზე.

”მართალი გითხრათ, მე არასოდეს მინახავს ასეთი ლამაზი პროექტები,” - თქვა მან.

აფხაზური მედიის თანახმად, მანამდე კირიენკომ აეროპორტში სამუშაოები დაათვალიერა „პრეზიდენტობის“ კანდიდატთან ბადრა გუნბასთან ერთად,  რომელიც აეროპორტის რეკონსტრუქციისა და მშენებლობის საკოორდინაციო შტაბს ხელმძღვანელობდა. 

აფხაზური ოპოზიცია მიიჩნევს, რომ გუნბას, არ ჰქონდა ამის უფლება შეხვედროდა კირიენკოს, საკოორდინაციო შტაბის უფროსის რანგში, რადგან ის კენჭს იყრის „საპრეზიდენტო არჩევნებში და მისი ყველა უფლებამოსილება“ შეჩერებულია.

სერგეი კირიენკოს, მომავალ ე.წ. არჩევნებთან დაკავშირებითაც დაუსვეს კითხვა, რომელზეც მან აფხაზ ჟურნალისტებს უპასუხა, რომ „რუსეთი პატივისცემით მიიღებს აფხაზი ხალხის ნებისმიერ არჩევანს“.

„საპრეზიდენტო არჩევნები“ ოკუპირებული აფხაზეთში 15 თებერვალს გაიმართება.