ზუგდიდელი მცირე მეწარმეების მხარდასაჭერად სოციალურ ქსელში კამპანია დაიწყო. იდეის ავტორი სამოქალაქო აქტივისტი და ხელნაკეთი ნივთების ოსტატი ციცინო შენგელიაა. როგორც ის ამბობს, ისევე, როგორც სხვა ნებისმიერი ბიზნესი, კორონავირუსის პანდემიის გამო დაწესებულმა შეზღუდვებმა, ხელნაკეთი ნივთების ოსტატები და სხვა მეწარმეები დააზარალა. ციცინო მიიჩნევს, რომ ახლა მნიშვნელოვანია საზოგადოებამ, განსაკუთრებით კი საჯარო სექტორში დასაქმებულმა ადამიანებმა მაღალი სოციალური პასუხისმგებლობა გამოიჩინონ და საახალწლო საჩუქრები, სწორედ ადგილობრივი ოსტატებისგან შეიძინონ. 

ფოტო: ციცისგან • by Tsitsi

"ახალ წლამდე 1 თვე დარჩა. პანდემიის მიუხედავად დარწმუნებული ვარ, რომ ყველანი ვეცდებით კარგი განწყობა შევუქმნათ საკუთარ თავს და ახლობლებს. ყველა რიტუალის წესის დაცვით ახალ სათამაშოს ან რაიმე საჩუქარს ვიყიდით მეგობრებისთვის ან ოჯახის წევრებისთვის. სწორედ აქ მინდა გაითვალისწინოთ ადგილობრივი რეწვის ოსტატები და მათი ნამუშევრები, საჩუქრები შეიძინოთ მათგან. ყველამ თითო ნივთი რომ იყიდოთ, ძალიან დიდ საქმეს გააკეთებთ პანდემიის პერიოდში, ხელს შეუწყობთ ადგილობრივ მეწარმეობას. ​ეს იქნება ყველაზე დიდი სოციალური აქცია და სამოქალაქო პასუხისმგებლობის გამოხატვა", - წერს ციცინო საკუთარ ფეისბუქ გვერდზე.

გარდა ამისა, ის მოუწოდებს ყველას, რომ საჩუქრის ყიდვასთან ერთად, სოციალურ ქსელში მეგობრებიც გამოიწვიონ. 

მომხმარებლისთვის საახალწლოდ სასაჩუქრე იდეების შეთავაზება უკვე დაიწყო ზუგდიდში არსებულმა ხელნაკეთი ნივთების საწარმომ "ტატური". მისი ერთ-ერთი დამფუძნებელი ნინო კემულარია ონლაინ კამპანიის იდეას მიესალმება და ამბობს, რომ ახლა, ადგილობრივი ნაწარმის პოპულარიზაცია განსაკუთრებით მნიშვნელოვანია.

ფოტო: Taturi / ტატური

"პირადად მე ვგეგმავდი ზოგ მაღაზიაში განმეთავსებინა საახალწლო თემატიკის ნაკეთობები, თუმცა, ფაქტობრივად, ყველაფერი დაიხურა. ისიც კი ვიფიქრე, იქნებ სოციალური ქსელის დახმარებით მოვაწყოთ მეწარმეებმა ერთობლივად საახალწლო ბაზრობა. ციცის ინიციატივა მომეწონა. აი მაგალითად "Secret Santa"-ს ჩელენჯია მოდაში ჩვენთან და ადგილობრივი ნაწარმი რომ შეიძინონ არ იქნება ურიგო. ხელშეწყობა ახლა ძალიან მნიშვნელოვანია ამ სეგმენტისთვის. ელემენტარული ჯაჭვური ქმედება იქნება, ბიძგი და სტიმული მეწარმეებისთვის", - გვითხრა ნინომ.

ვიდეო: Taturi / ტატური

საახალწლო სათამაშოები, დეკორაციები, სამკაულები - "მალოს ხელნაკეთი სუვენირების" სახელოსნოშიც დიდი ხანია სადღესასწაულო ფუსფუსია. ოსტატი შეკვეთებს 5 წლის შვილთან ერთად ამზადებს. ემილი "სამსახურს" გაორმაგებული პასუხისმგებლობით ეკიდება. 

ფოტო: Malo Handmade - ხელთნაკეთი სუვენირები

"ჩვენთვის, რეგიონის მეწარმებიისთვის ძალიან მნიშვნელოვანია, წლების განმავლობაში დიდი შრომის შედეგად შენარჩუნებულმა ჩვენმა საქმიანობამ, სახელოსნოებმა არსებობა გააგრძელონ ამ პანდემიის დროს. ეს მაშინ, როცა ერთადერთი შემოსავლის წყარო სწორედაც რომ ჩვენს მიერ შექმნილი ნივთების გაყიდვიდან შემოსული თანხაა. ძალიან სწორი არის ციცის წამოწყება, რომ ადგილობრივმა საჯარო სექტორმა, ასევე ბანკებმა და სხვადახხვა ორგანიზაციებმა სწორედ ჩვენივე რეგიონში დამზადებული ნივთებით გაუკეთონ ერთმანეთს საჩუქრები. მე პირადად რამოდენიმე მაღაზიაში ვყიდდი პანდემიამდე malo handmade-ის პროდუქციას, თუმცა კოვიდის გამო აქსესუარების არცერთი მაღაზია ნორმალურად არ ფუნქციონირებს. ამიტომაც დამოკიდებული ვართ მხოლოდ ონლაინ გაყიდვებზე. თუ ერთმანეთის გვერდით დავდგებით ასეთ რთულ პერიოდში, მჯერა, ესეც გადაივლის და ფეხზე მყარად ვიდგებით", - მიიჩნევს მალო კოტუა. ქვეყანაში კორონავირუსის გავრცელების პრევენციისთვის 28 ნოემბრიდან 24 დეკემბრამდე დიდ ქალაქებში, მათ შორის კი ზუგდიდშიც სურსათის მაღაზიების, სილამაზისა და სპა სალონების გარდა, დაიკეტა ყველა სავაჭრო ობიექტი. თვითდასაქმებული მოქალაქეები სახელმწიფოსგან კომპენსაციის სახით ერთჯერადად 300 ლარს მიიღებენ. გარდა ამისა, მთავრობა მათ საბანკო სესხების გადავადებაში დაეხმარება.