საჯარო სკოლებში სწავლა 15 სექტემბერს დაიწყება და მშობელთა ნაწილმა მომზადება უკვე დაიწყო. სახელმძღვანელოებს ბავშვებს სკოლაში გადასცემენ, მაგრამ გარდა წიგნებისა, მშობლებს სხვა სასკოლო ნივთების ყიდვა უწევთ.
რადიო „ათინათი“ დაინტერესდა, თუ რა უჯდება საშუალოდ მშობელს შვილის სკოლაში გაშვება. როგორც სასკოლო ნივთების მაღაზიაში გვიყვებიან, წინა წლებთან შედარებით ნივთების ფასები არ მომატებულა და იგივე რჩება, სკოლის დაწყების წინ კი მოთხოვნა განსაკუთრებულად მზარდია.

საკანცელარიო მაღაზიაში გვითხრეს, რომ არჩევანი საკმაოდ ფართოა და აქვთ როგორც დაბალფასიანი, ასევე, მაღალფასიანი ჩანთები და ნივთები: რვეული, სახატავი რვეული, ფერადი ფურცლები, კალამი, საშლელი, სათლელი, უბრალო ფანქარი, ფერადი ფანქრები, ფლომასტერი, სახაზავი, წებო, კორექტორი, საძერწი, მაკრატელი და პენალი. მათი ფასი ჯამში საშუალოდ 50-დან 150 ლარამდე მერყეობს.

გარდა სასკოლო ნივთებისა, მშობლებმა ახალი ტანისამოსის შეძენაზეც უნდა იზრუნონ. მათი თქმით, ბავშვის სკოლაში შეყვანა საშუალოდ 400-დან 500 ლარამდე ჯდება.

„სამი შვილის სკოლაში შეყვანა ჩემი გამოთვლით 600 ლარი დამიჯდება, თუმცა გააჩნია სად შევიძენთ ნივთებს“, - თქვა ჩვენმა რესპოდენტმა, რომელიც ნივთებს სასკოლოდ შვილებისთვის არჩევდა.

ჩანთების მინიმალური ფასი 35 ლარიდან იწყება. გამყიდველმა აღნიშნა, რომ წინა წლებთან შედარებით ფასები ისევ სტაბილურია და არ გაზრდილა, მოთხოვნა განსაკუთრებით დიდია ბიუჯეტურ ჩანთებზე.

„ჩემი შვილის სკოლაში გაშვების ხარჯები, დაახლოებით, 1000 ლარია, რაც ჩვენი ბიუჯეტის გათვალისწინებით, დამეთანხმებით, საკმაოდ ძვირია“, - გვითხრა ერთ-ერთმა მშობელმა.

რადიო „ათინათი“ გთავაზობთ ძირითადი სასკოლო ნივთების საშუალო ფასებს:

პენალი - 2-დან 75 ლარის ჩათვლით.
რვეული - 0.65-დან 1.15 ლარამდე.
სახატავი რვეული - 1.20 -დან - 4 ლარამდე.
ფერადი ფურცელი -7 ლარი.
საძერწი - 2-დან 10 ლარამდე.
საშლელი - 1.5-დან 5 ლარის ჩათვლით.
სახაზავი - 0.60 – 10 ლარის ჩათვლით.
სათლელი - 1-დან 4 ლარამდე.
კორექტორი - 1.5 ლარი.
მაკრატელი - 1.5-დან – 5 ლარამდე.
უბრალო ფანქარი - 0.20-დან 1.5 ლარის ჩათვლით.
ფერადი ფანქრები - 1.5 – 30 ლარი.
ფლომასტერი - 1.5 – 25 ლარი.