31 აგვისტოს კოლხეთის ეროვნულ პარკში პროექტის "გარემოს დაცვის ერთობლივი მონიტორინგი შავი ზღვის აუზის ქვეყნებში" დასკვნითი შეხვედრა და პრესკონფერენცია გაიმართა. პროექტს საზოგადოება ბუნების კონსერვაციისთვის "საბუკო" 2020 წლიდან, ევროკავშირის ფინანსური მხარდაჭერით ახორციელებდა. 

პროექტის მიზანს წარმოადგენდა შავი ზღვის აუზის დაცულ ტერიტორიებზე მოქმედი ანთროპოგენული ზემოქმედების შესწავლა და მოპოვებულ მონაცემებზე დაყრდნობით პრობლემების გადაჭრის გზების მოძიება. ამისთვის, საქართველოს მხრიდან კოლხეთის ეროვნული პარკი, ტერიტორიაზე არსებული მნიშვნელოვანი ჰაბიტატების სიმრავლისა და ინვაზიური სახეობების გავრცელების გამო შეირჩა. "ამ მიმართულებით ჩატარდა ბევრი სამუშაო. კოლხეთის ეროვნული პარკი გამოირჩევა უნიკალური ბიომრავალფეროვნებით, მისი შენარჩუნება, დაცვა, აღდგენა მოითხოვს მეცნიერულად დასაბუთებულ კვლევებს და მონიტორინგს. "საბუკომ" გასწია დიდი სამუშაო. ეს შეეხება ჰაერისა და ატმოსფეროს შესახებ მონაცემების შეგროვებას. პალიასტომის ტბასა და მის შენაკადებზე დააყენეს ლარტყები, მონაცემები ყოველდღიურად მუშავდება, შეჯამდება და გამოყენებულ იქნება შესაბამისობაში. ასევე მნიშვნელოვანია წავის შესახებ მონიტორინგი, რომელიც არის წითელი ნუსხის სახეობა. ერთ-ერთი მთავარი სამუშაოა დრონით კადრები ინვაზიური სახეობების შესახებ, რომელთა გავრცელების არეალი იზრდება. დაკონკრეტდება არეალი და დაისახება გადაჭრის გზები. სამუშაოებში ჩართულები იყვნენ რეინჯერები, მოსახლეობაც. ამ მონაცემებს დავამუშავებთ, გაკეთდება ანალიზები, გამოყენებული იქნება კვლევებისთვის. მადლობა "საბუკოს" და ვიმედოვნებთ, რომ ჩვენი თანამშრომლობა ამით არ დასრულდება", - აღნიშნა  კოლხეთის ეროვნული პარკის ბუნებრივ რესურსების მთავარმა სპეციალისტმა მანანა ჩიქოვანმა.

შეხვედრაზე შეკრებილ საზოგადოებას, საბუკოს წარმომადგენლებმა, პროექტის შედეგები გააცნეს. ორი წლის განმავლობაში, პროექტის ფარგლებში არაერთი მნიშვნელოვანი კვლევა განხორციელდა. პარკის ტერიტორიაზე დამონტაჟდა წყლისა და ჰაერის ხარისხის მონიტორინგის სისტემები, განხორციელდა ჰაბიტატების კვლევა სრულიად ინოვაცოური მეთოდით - დრონის გამოყენებით. შემუშავდა ძუძუმწოვრებისა და ფრინველების კვლევის მეთოდოლოგია და დაიწყო სახეობების ახალი მიდგომებით კვლევა. პროექტის მსვლელობისას, კვლევისა და მონიტორინგის პროცესში საბუკოს თანამშრომლებთან ერთად მონაწილეობას იღებდნენ კოლხეთის ეროვნული პარკის რეინჯერებიც. "პროექტში ჩართული ვარ 2 წელია, ვახორციელებდით ნუტრიას და წავის კვლევას პალიასტომის ტბასა და მის შენაკადებზე. პროექტის დასკვნით ეტაპზე გაიმართა ძალიან საინტერესო შეხვედრა ბულგარეთში, სადაც აშენდა ლაბორატორია, რომლის საშუალებითაც შავი ზღვის აკვატორიის ქვეყნებს აქვთ საშუალება განახორციელონ კვლევები. ეს ახალი შესაძლებლობაა ბიომრავალფფეროვნების კვლევისთვის, მეცნიერებისთვის, შეისწავლონ არსებული სიტუაცია, ახალგაზრდებისთვის, რომ განავითარონ ცოდნა და გამოცდილება. დღეს კი გავაცანით კოლხეთის ეროვნული პარკის ადმინისტრაციას მიმდინარე პროცესი, საბოლოო ანგარიში, ასევე, პროექტის მონაწილე ქვეყნებმა - სომხეთმა,  ბულგარეთმა და რუმინეთმა წარადგინეს კვლევის შედეგები", - თქვა "საბუკოს" კონსერვაციის ოფიცერმა გიორგი ჩიკორაშვილმა.

"საბუკოსა" და კოლხეთის ეროვნულ პარკს შორის გაფორმდა ურთირთთანამშრომლობის მემორანდუმი, რომლის საფუძველზეც პარკის ადმინისტრაცია და თანამშრომლები პროექტის განმავლობაში შეძენილი ინვენტარით, მათ შორის მონიტორინგის სისტემებით სარგებლობას გააგრძელებენ. ერთობლივი მონიტორინგი და კვლევები ორივე მხარის ჩართულობით მომავალშიც არის დაგეგმილი. "ჩვენი თანამშრომლობა ნაყოფიერი და საინტერესო გამოდგა, უზრუნველყოფილი იყო დაინტერესებული მხარეების ჩართვა, მათ შორის, ეროვნული პარკის ადმინისტრაციის ექსპერტების, მეცნიერების, ბუნებრივი რესურსებით მოსარგებლე პირების, მეთევზეების, ახალგაზრდების. მათ ორი წლის განმავლობაში შეხვედრებსა და ტრენინგებში მიიღეს მონაწილეობა, მნიშვნელოვანია ისიც, რომ მემორანდუმი მზადდება, რომლის თანახმადაც  "საბუკოს" სარგებლობაში არსებული ნავი გადაეცემა ეროვნულ პარკს, რაც გააადვილებს ბიომრავალფეროვნების მონიტორინგს და აქტიურად იქნება გამოყენებული სხვადასხვა სახეობაზე მონიტორინგისთვის", - ამბობს ადმინისტრაციული განყოფილების უფროსი ხათუნა ქაცარავა.

პროექტის შედეგად შეგროვილი მონაცემები ფართო საზოგადოებისთვის ხელმისაწვდომი მოგვიანებით გახდება.