დევნილთა დაბრუნება, საქართველოს ტერიტორიაზე, ბარიერების დაყენება და ოკუპირებული რეგიონების მცხოვრებთა უფლებების დარღვევა. ეს და სხვა მრავალი აქტუალური საკითხი, საქართველოს დელეგაციამ ჟენევის საერთაშორისო დისკუსიების 27- ე რაუნდზე დააყენა. შერიგებისა და სამოქალაქო თანასწორობის საკითხებში სახელმწიფო მინისტრის მოადგილის ქეთევან ციხელაშვილის განცხადებით, ჟენევის დისკუსიების დასრულების შემდეგ, „აფხაზური მხარის წარმომადგენლებმა ამ რეგიონში მცხოვრებ ქართველთა სწავლისა და განათლების უფლების დასაცავად , ოპტიმალური გამოსავლის ძიების პირობა დადეს“. გარდა ამისა, მინისტრის მოადგილის თქმით, სოხუმის ხელისუფლებამ „დე ფაქტო აფხაზეთის ტერიტორიაზე არსებული ქართული კულტურის ძეგლების თვითმყოფადობის შენარჩუნების გზების პოვნის“ პირობაც დადო. «შესაძლოა შეიქმნას კომისია, რომლის მუშაობაში ქართველი, აფხაზი და საერთაშირისო ექსპერტები მიიღებენ მონაწილეობას.», - აღნიშნა ციხელაშვილმა.