საბჭოთა კავშირის დაშლიდან მოყოლებული აშშ-მა უკრაინის დემოკრატიის მხარდასაჭერად, დაახლოებით 5 მილიარდი დოლარი გამოყო. ამის შესახებ აშშ-ის სახელმწიფო მდივნის თანაშემწემ ევროპისა და ევრაზიის საკითხებში ვიქტორია ნულანდმა ტელეკომპანია CNN-თან საუბრისას განაცხადა. "ეს თანხა დაიხარჯა უკრაინელი ხალხის მისწრაფებების მხარდასაჭერად – ჰყავდეთ ძლიერი, დემოკრატიული ხელისუფლება, რომელიც მათ ინტერესებს წარმოადგენს", - განაცხადა ვიქტორია ნულანდმა. ამასთან, აშშ-ის სახელმწიფო მდივნის თანაშემწემ აღნიშნა, რომ აშშ-ის არაფერი დაუხარჯავს მაიდნის მხარდასაჭერად. "ეს იყო სპონტანური მოძრაობა, რომელიც მკვეთრად განსხვავება იმ ქმედებისგან, რასაც ახლა რუსეთი აღმოსავლეთ უკრაინაში ჩადის", - აღნიშნა ვიქტორია ნულანდმა. ამასთან, აშშ-ის სახელმწიფო მდივნის თანაშემწემ განაცხადა, რომ უკრაინის ხელისუფლება კარგად ართმევს თავს მის წინაშე დაყენებულ ორ მთავარ ამოცანას. მისივე თქმით, პირველი- მსოფლიო სავალუტო ფონდთან ურთიერთობის დამყარება და ანტიკორუფციული რეფორმის დაწყებაა, მეორე კი, სამართლიანი და თავისუფალი საპრეზიდენტო არჩევნების ჩატარება. CNN-თან საუბრისას ვიქტორია ნულანდმა ასევე განაცხადა, რომ რუსეთს არ შეუძლია ერთდროულად გააგრძელოს იმის განცხადება, რომ მხარს უჭერს უკრაინაში ვითარების დეესკალაციას და ამვდროულად გაამწვავოს არეულობა. "შეუძლებელია მეხანძრის ფორმა გეცვას და ცეცხლის გამჩენივით იქცეოდე", - აღნიშნა ვიქტორია ნულანდმა.