ოდესაში სამდღიანი გლოვა გამოცხადდა. სეპარატისტებსა და უკრაინის ერთიანობის მხარდამჭერთა შორის მომხდარი შეტაკების შედეგად, გუშინ, 43 ადამიანი დაიღუპა. ამის შესახებ ადგილობრივი მედია იუწყება. "წინასწარი მონაცემებით, შეტაკებების შედეგად 43 ადამიანი დაიღუპა. ტრაგიკულ მოვლენებთან დაკავშირებით ოდესაში 3, 4 და 5 მაისი გლოვის დღედ გამოცხადდა", - ნათქვამია ოდესის მერიის განცხადებაში. ამასთან, ადგილობრივი მედიის ინფორმაციით, შეტაკებების შედეგად 200-მდე ადამიანია დაშავებული, მათგან 25 მძიმე მდგომარეობაშია. ოდესაში, გუშინ პრორუს და უკრაინის ერთიანობის მხარდამჭერებს შორის შეტაკება მას შემდეგ დაიწყო, რაც სეპარატისტებმა აქციის მონაწილეებს გზა გადაუღობეს და ქვებისა და ხმოვანი ყუმბარების სროლა დაუწყეს. მოგვიანებით, ანტიმაიდანის წევრები და პრორუსი აქტივისტები პროფკავშირების სახლში შეიჭრნენ, რომელსაც ე.წ. მოლოტოვის კოქტეილების სროლის შედეგად ცეცხლი გაუჩნდა. ცეცხლმოკიდებულ შენობაში დარჩენილი სეპარატისტები პროუკრაინელ აქტივისტებს გამოჰყავდათ.