ლტოლვილთა და განსახლების მინისტრმა დალი ხომერიკმა სენაკის სამხედრო დასახლებაში მცხოვრები დევნილები მოინახულა, სადაც დევნილებმა კონსულტაციები ობიექტის დაკანონებისა და საკუთრებაში გადაცემის საკითხებზე პირადად მინისტრთან გაიარეს. დალი ხომერიკმა ამხანაგობის პროგრამაზე ისაუბრა, რათა მომავალში მოსახლეობამ ადგილობრივ მუნიციპალიტეტთან ერთად კოორდინირებულად მოაგვაროს გარე ინფრასტრუქტურული საკითხები. აგრეთვე დევნილებს განუმარტა, რომ ინდივიდუალური საკითხების გამოკვეთის მიზნით, მნიშვნელოვანია დევნილთა საჭიროებების შემსწავლელი პროგრამის ფარგლებში, ინტერვიუერების დახმარებით, აპლიკაციების დეტალურად შევსება. სენაკის სამხედრო დასახლებაში აფხაზეთიდან დევნილი 558 ოჯახი 1993 წლიდან ცხოვრობს. სენაკის სამხედრო დასახლების 32-ვე კორპუსი სრულიად რეაბილიტირებულია, დამონტაჟებულია ინდივიდუალური ელ.მრიცხველები, შეცვლილია წყლის შიდა გაყვანილობა. მინისტრი ასევე ესტუმრა მენჯის სანატორიუმ „კოლხეთში“ მცხოვრებ დევნილებს, სადაც აფხაზეთიდან დევნილი 55 ოჯახი ცხოვრობს. დალი ხომერიკმა დაათვალიერა საცხოვრებელი ბინები და ადგილზე მოისმინა მათი საჭიროებები. დევნილები დაინტერესდნენ მათი განსახლების სამომავლო გეგმებით და საუბრისას აღნიშნეს, რომ სურვილი აქვთ დაკმაყოფილდნენ ალტერნატიული საცხოვრებელი ფართებით.

მინისტრი სამეგრელოს რეგიონში შეხვედრებს განაგრძობს.