შვეიცარიის კონფედერაციის პრეზიდენტი დიდიე ბურკჰალტერი იმედოვნებს, რომ ინციდენტების პრევენციისა და მათზე რეაგირების მსგავსი მექანიზმი გალშიც ამოქმედდება . აღნიშნულთან დაკავშირებით საქართველოში ვიზიტით მყოფმა შვეიცარიის კონფედერაციის პრეზიდენტმა ერნგეთში განაცხადა, სადაც ინციდენტების პრევენციისა და მათზე რეაგირების მექანიზმის ჯგუფის მუშაობას გაეცნო. "მინდა ვთქვა, როგორც ეუთო-ს თავმჯდომარე ქვეყნის პრეზიდენტმა, იმედს ვიტოვებ, რომ ინციდენტების პრევენციისა და მათზე რეაგირების მექანიზმი იმ ფორმატში, როგორიც ერგნეთშია მალე გალშიც ამოქმედდება. სამწუხაროა, რომ გამყოფმა ზოლმა შუაზე გახლიჩა ნაკვეთები, დააშორა ერთმანეთს მეზობლები და ოჯახის წევრები. გამყოფი ზოლის გასწვრივ მყოფი ადამიანები, რომლებიც ადრე ერთად ცხოვრობდნენ, ყოველდღიურად სირთულეებს აწყდებიან ამის გამო. იმისთვის, რომ დავძლიოთ კონფლიქტი და დავადგეთ შერიგების გზას, საჭიროა ადმინისტრაციული სასაზღვრო ზოლის გასწვრივ მცხოვრებმა ადამიანებმა შეინარჩუნონ კონტაქტი. თქვენ არაერთხელ დაგვანახეთ, რომ შეგწევთ უნარი შეიმუშაოთ ტექნიკური და პრაგმატული მეთოდები ადამიანების პრობლემების გადასაჭრელად. ყველა ადამიანი, რომელმაც მონაწილეობა მიიღო ინციდენტების პრევენციისა და მათზე რეაგირებისა და ცხელი ხაზის მექანიზმის დანერგვასა და მის რეალიზებაში ღრმა პატივსცემასა და ხელშეწყობას იმსახურებს", - განაცხადა შვეიცარიის კონფედერაციის პრეზიდენტმა. ამასთან, მისივე თქმით, უმნიშვნელოვანესია შენარჩუნდეს არასაომარი ვითარება. "ვიცი, რომ წარსულში მომხდარი ძალადობით გამოწვეული ტკივილი, ჯერ კიდევ არ ჩამცხრალა, უფრო მეტიც, მიუხედავად არსებული პოლიტიკური სირთულეებისა, მე მინდა გთხოვოთ განაგრძოთ მუშაობა შედეგზე ორიენტირებული სულისკვეთებით, რათა პრაგმატული გზები გამოინახოს", - აღნიშნა დიდიე ბურკჰალტერმა. ამასთან, შვეიცარიის პრეზიდენტის განცხადებით, მათთვის ერთ-ერთი პრიორიტეტული საკითხია ასევე საქართველოში ეუთო-ს წარმომადგენლობის აღდგენა. "ჩვენ ამაზე ვსაუბრობთ", - დასძინა დიდიე ბურკჰალტერმა.