პრესკონფერენციაზე, რომელიც ალექსანდრე ანქვაბმა ადგილობრივი მედიის წარმომადგენლებისათვის გამართა, როგორც საშინაო, ისე საგარეო პოლიტიკასთან დაკავშირებულ პრობლემათა ფართო სპექტრი განიხილებოდა. უპირველეს ყოვლისა ჟურნალისტებს აინტერესებდათ, შეიცვლება თუ არა საქართველოს საგარეო პოლიტიკა, აფხაზეთთან მიმართებაში ახალი ხელისუფლების მოსვლასთან ერთად. სოხუმის ლიდერს ამასთან დაკავშირებით ოპტიმიზმი არ გამოუხატავს. თუ ქართული ოცნება – აფხაზეთის დაბარუნებაა– მაშინ ის ილუზორულია, აღნიშნა მან. “თუკი საქართველო აპირებს დაალაგოს აფხაზეთთან კეთილმეზობლური, თანაბარუფლებიანი ურთიერთობა, მაშინ ეს კარგი ოცნებაა“ , – განაცხადა ანქვაბმა, თუმცა ამ უკანასკნელ მოსაზრებას ის ეჭვით უყურებს. კითხვაზე, აქვს თუ არა აზრი ჟენევის დისკუსიების გაგრძელებას, თუკი აფხაზეთი არ ეთანხმება მის ფორმატს, ანქვაბმა უპასუხა, რომ ზოგიერთი გამონაკლისის გარდა, დისკუსიებს აბსოლუტურად საჩვენებელი ხასიათი აქვთ. თუ დასავლეთი შეძლებს გააგრძელოს სერიოზული პროექტები აფხაზეთში, არის მზაობა, რომ ისინი განიხილონ, – დასძინა მან. პრესკონფერენციაზე ალექსანდრე ანქვაბმა ასევე უპასუხა დე ფაქტო აფხაზეთის სოციალურ–ეკონომიკურ განვითარებასთან, საკრედიტო დავალიანებასთან, ე.წ. ადგილობრივი ხელისუფლების როლთან და სოხუმ ჰესის მომავალთან დაკავშირებულ კითხვებს.