აფხაზეთის ე.წ.ადმინისტრაციის საექსპერტო სამმართველოს ხელმძღვანელი ირაკლი ხინთბა ზურაბ აბაშიძის განცხადებას გამოეხმაურა. საქართველოს პრემიერ-მინისტრის სპეციალურმა წარმომადგენელმა რუსეთთან ურთიერთობის საკითხებში,  „რია ნოვისტის“ განუცხადა , რომ საქართველო, აფხაზეთთან და სამხრეთ ოსეთთან დიალოგის ახალ შესაძლებლობებს განიხილავს და მოხარული იქნება, თუკი რუსეთი მათთან პირდაპირ კონტაქტს შეუწყობს ხელს. „ მზად ვართ, სტატუსთან დაკავშირებული საკითხები გვერდზე გადავდოთ, თუკი აფხაზეთსა და სამხრეთ ოსეთთან დიალოგი დაიწყება“,-  თქვა ინტერვიუში ზურაბ აბაშიძემ. ირაკლი ხინთბა დარწმუნებულია, რომ დე ფაქტო აფხაზეთსა და საქართველოს შორის ჰუმანიტარულ და ეკონომიკურ საკითხებში  დიალოგის დასაწყებად, ნდობის სათანადო დონე და მოლაპარაკებების სივრცის არსებობაა აუცილებელი. ამის შესახებ მან „სპუტნიკ - აფხაზია“- ს განუცხადა. აფხაზი ექსპერტი თვლის, რომ ამ ეტაპზე საქართველოს მხრიდან ძალის გამოუყენებლობის იურიდიული მექანიზმების არარსებობის პირობებში, ნდობის მინიმალურ ზღვარზეც კი ზედმეტია ლაპარაკი. მისი აზრით, საქართველოს ოფიციალური პირების ცალმხრივ დეკლარაციებს, ისევე , როგორც საქართველოს პარლამენტის რეზოლუციას, არანაირი ძალა არა აქვს. " საქართველო  აფხაზეთთან შეთანხმების ხელმოწერას პოლიტიკურ- სამართლებრივი თვალსაზრისით მგრძნობიარე საკითხად მიიჩნევს.თბილისის ასეთ პოზიციას ჩვენ განვიხილავთ, როგორც არალოგიკურს, ქართულ-აფხაზური ურთიერთობების პროცესისთვის ხელისშემშლელს“- ის თვლის, რომ ახლა აფხაზურ-ქართულ კონტექსტში „ ნულოვანი თანხის თამაშები“ სჭარბობს და პრაქტიკულად არ განიხილება სასიცოცლხოდ მნიშვნელოვანი საკითხები, რომელთა გადაწყვეტა უშუალოდ არის მიბმული  დიალოგთან, ენგურჰესის ერთობლივი ექსპლუატაციის საკითხის გამორიცხვით,დასძინა ხინთბამ. ის არ გამორიცხავს მოლაპარაკებების გამართვის შესაძლებლობებს ისეთ თემებზე, როგორიცაა სამხრეთკავკასიური სარკინიგზო მაგისტრალის აღდგენა,საქართველოს მხრიდან  პოლიტიკური ნების გამოხატვისა და რუსი კოლეგების თანადგომის შემთხვევაში.