ენგურჰესზე წყლის არასაკმარისი რაოდენობის გამო 1 თებერვლიდან აპრილის შუა რიცხვებამდე აფხაზეთს ელეტქროენერგია შეზღუდვებით მიეწოდება. ენგურჰესის სადგურზე ქართული და აფხაზური მხარეები ერთობლივად აწარმოებენ აღდგენით სამუშაოებს, რომელთა მსვლელობას საქართველოს ენერგეტიკის მინისტრი კახი კალაძე და კომპანია „ჩერნომორენერგოს“ ხელმძღვანელი რეზო ზანთარია ადევნებენ თვალს. "Абхазский узел" - ის ინფორმაციით ექსპლუატაციაში 4 ახალი აგრეგატი შევიდა, მეხუთეს შეკეთება მიმდინარე წლის ბოლოსთვის დასრულდება. ჰესის სამანქანო დარბაზი, სადაც გენერატორებია დაყენებული 120 მეტრის სიღრმეზეა განლაგებული. ყოველი აგრეგატის სიმძლავრე 265 მეგავატია, საერთო ჯამში მათ ათასზე მეტი მეგავატის გამომუშავება შეუძლიათ. ტურბინების ასამოძრავებლად წამში 90 კუბი წყალია საჭირო, რომლეიც ენგურჰესის კაშხლიდან 6 მ დიამეტრის მქონე მილების საშულებით მიეწოდებათ. მიუხედავად ამისა, აფხაზური ინტერნეტ გამოცემა აღნიშნავს, რომ ამჟამად სადგური სრული დატვირთვით არ მუშაობს და მოქმედი სიმძლავრეების მხოლოდ ნახევარი გამოიყენება. მიზეზად კაშხალზე წყლის არასაკამრისი რაოდენობა სახელდება. წყალსაცავის წყლით შევსება, ჩვეულებრივ აპრილის შუა რიცხვებში ხდება, თუმცა, წლევანდელი ზამთარი ნაკლებად თოვლიანი იყო, შესაბამისად წყლის დონემ საჭირო ნიშნულს ვერ მიაღწია. სპეციალისტების აზრით, წყლის დონე 475 მეტრია, ეს კი მხოლოდ ერთი თვის სამყოფია, ამ მაჩვენებლებს თუ კილოვატ-საათებში გადავიყვანთ, გამოდის, რომ წყლის დონე, მხოლოდ 305 მილიონი კილოვატ-საათის გამოსამუშავებლადაა საკმარისი, როდესაც აფხაზეთში ზამთრის პერიოდში დღე-ღამეში 7 მილიონ კილოვატ-საათი მოიხმარება. "Абхазский узел"-ის ინფორმაციით რეზო ზანთარიასა და კახი კალაძის შეხვედრისას ხელი მოეწერა წყლის გამომუშავების გრაფიკს. დოკუმენტის თანახმად, პირველი თებერვლიდან, აფხაზეთში ელექტროენერგიის მიწოდების მარაოსებრი სისტემა ამოქმედდება, რაც აპრილის შუა რიცხვებამდე გასტანს.