გამრიცხველიანების პროცესი აქტუალური მას შემდეგ გახდა, რაც ენერგეტიკის მინისტრმა კახი ლაკაძემ გასულ კვირას ენგურჰესი მოინახულა. მინისტრი თვითაღიარებული რესპუბლიკის ენერგეტიკის მინისტრს რეზო ზანთარაიას შეხვდა. შეხვედრაზე ხელი მოეწერა წყლის გამომუშავების გრაფიკს. დოკუმენტის თანახმად, პირველი თებერვლიდან, აფხაზეთში ელექტროენერგიის მიწოდების მარაოსებრი სისტემა ამოქმედდება, რაც აპრილის შუა რიცხვებამდე გასტანს. ამის შესახებ ინფორმაციას რუსული მედია ავრცელებს. რადიო „ათინათი“ აღნიშნულ საკითხთან დაკავშირებით გალის რაიონის ქვედა ზონის სოფლების: განახლების ადა ოტობააის მაცხოვრებლებს გაესაუბრა. მათი ინფორმაციით, პარალელურად ელექტრო ენერგიის საფასურის ზრდაც იგეგმება. „ჩვენთან აფხაზეთში თვეში 13 ლარს ვიხდით, მიმდინარე წელს თანხა 30 ლარამდე გაიზრდებაო ამბობენ, რაც 600 რუსული რუბლია“,–აცხადებს სოფელ ოტობაიის მკვიდრი. სოფელ განახლების მაცხოვრებელი აღნიშნავს, რომ გალში გამრიცხველიანების პროცესი ჯერ კიდევ გასულ წელს დაიწყო, ხოლო სოფელში მაღალი ძაბვის ხაზები შეყვანილია. სოფლის მაცხოვრებლები იმედს გამოთქვამენ, რომ გამრიცხველიანების პროცესი მალე დაიწყება.