ოკუპირებული აფხაზეთის დე ფაქტო ლიდერს საქართველოში ნატო-ს საწვრთნელი ცენტრის შექმნა აშინებს. "ინტერფაქსთან" ინტერვიუში რაულ ხაჯიმბამ განაცხადა, რომ რთული გეოპოლიტიკური ვითარების გათვალისწინებით, აფხაზეთისა და რუსეთისთვის , მთლიანად რეგიონის სტაბილურობისთვის, ეს სახიფათოა. "დასავლეთი აქტიურად ცდილობს რუსეთისთვის ნატოს სანიტარული დერეფნის შემოვლებით, დასახული ამოცანა შეასრულოს. რუსეთი ჩვენი მოკავშირეა და ჩვენ გულგრილნი ვერ ვიქნებით ამ პროცესების მიმართ. სწორედ ამ ფონზე გააქტიურდა რუსეთ-აფხაზეთის თანამშრომლობა, სამხედრო სფეროში თავდაცვის ერთიანი კონტურის შესაქმნელად", - აცხადებს ხაჯიმბა. კითხვას,ისევ განიხილავს თუ არა საქართველოს აფხაზეთისთვის საფრთხედ და შესაძლებელია თუ არა რევანშისტული განწყობების რეციდივი თბილისის პოლიტიკურ წრეებში, ხაჯიმბა პასუხობს, რომ განიხილავს, რადგან, მისი თქმით, ტექნიკურად, სოხუმი საომარ ვითარებაში იმყოფება. თუმცა, დე ფაქტო პრეზიდენტი აღნიშნავს, რომ საქართველოს ამჟამინდელი ხელისუფლების რიტორიკა იმდენად აგრესიული არ არის, როგორც ადრე იყო, მაგრამ, მისი თქმით, ქართულმა მხარემ თავისი მშვიდობისმოყვარეობა უნდა დაამტკიცოს.