გაეროს გენერალურმა ასამბლეამ "აფხაზეთიდან, ცხინვალის/სამხრეთ ოსეთის რეგიონიდან და საქართველოს ტერიტორიებიდან იძულებით გადაადგილებულ პირთა და ლტოლვილთა სტატუსის შესახებ" რეზოლუცია მიიღო. რეზოლუცია გმობს საქართველოს ოკუპირებულ რეგიონებში ძალისმიერი გზით განხორციელებულ დემოგრაფიულ ცვლილებებს, ხაზს უსვამს დევნილთა საკუთარ სახლებში ღირსეული და უსაფრთხო დაბრუნების აუცილებლობას ეთნიკური კუთვნილების მიუხედავად, ყურადღებას ამახვილებს მათი საკუთრების უფლების პატივისცემასა და დაცვაზე. ამასთან, რეზოლუცია ხაზს უსვამს აფხაზეთის და ცხინვალის რეგიონებში ჰუმანიტარული საქმიანობის შეუფერხებლად განხორციელების გადაუდებელ აუცილებლობას. მნიშვნელოვანია, რომ რეზოლუცია მოუწოდებს ჟენევის საერთაშორისო მოლაპარაკებების მონაწილეებს, გაააქტიურონ ძალისხმევა ოკუპირებულ რეგიონებში უსაფრთხოებისა და ადამიანის უფლებების კუთხით არსებული მდგომარეობის გასაუმჯობესებლად, რაც ხელს შეუწყობს იძულებით გადაადგილებულ პირთა და ლტოლვილთა საკუთარ სახლებში დაბრუნებას. რეზოლუციას გასულ წელთან შედარებით ექვსით მეტმა, 75 ქვეყანამ დაუჭირა მხარი. მსოფლიოს დემოკრატიული საზოგადოების გადაწყვეტილებით დევნილი მოსახლეობის დაბრუნებისა და ფუნდამენტურ უფლებებთან დაკავშირებული საკითხების პოლიტიზირება არ შეიძლება და ეს ჰუმანიტარულ პრობლემას წარმოადგენს. "რეზოლუციის მხარდაჭერის თვალსაზრისით, პოზიტიური დინამიკა ადასტურებს, რომ საერთაშორისო თანამეგობრობა სულ უფრო ნათლად აცნობიერებს საქართველოს ოკუპირებული რეგიონებიდან იძულებით გადაადგილებულ პირთა ფუნდამენტური უფლებების განხორციელების მნიშვნელობას. საქართველოს მთავრობა მადლობას უხდის ყველა იმ სახელმწიფოს, რომელმაც რეზოლუციას მხარი დაუჭირა და ამით თითოეულ დევნილს თანაგრძნობა გამოუცხადა. ჩვენ ვეცადეთ რომ ეს არ ყოფილიყო პოლიტიკური რეზოლუცია და შემოფარგლულიყო ჰუმანიტარული ხასიათით.მსოფლიოს დემოკრატიულმა საზოგადოებამაც აღიარა, რომ ეს არის ჰუმანიტარული პრობლემა, ის საჭიროებს ყურადღებას პირველ რიგში გაეროს მხრიდან", - ნათქვამია საგარეო უწყების განცხადებაში.