ქართულ და აფხაზურ მხარეებს შორის გამართული მოლაპარაკებების დროს, დე ფაქტო აფხაზეთის ტერიტორიაზე გამავალი დერივაციული გვირაბის რემონტზე შეთანხმდნენ. „ჩერნომორენერგოს“ ხელმძღვანელმა ასლან ბასარიამ 12 ივნისს გამართულ პრესკონფერენციაზე განაცხადა,რომ საქმე ეხება გვირაბს,რომელიც „აფხაზეთის ტერიტორიაზე საქართველოს მხრიდან შემოდის“. მისი თქმით, სწორეს მისი გავლით მიედინება წყლის მთლიანი მასა, რომლის საშუალებითაც უკვე აფხაზეთში გამომუშავდება მთელი ელექტროენერგია. "ის უკვე წლებია არ შეკეთებულა, თუმცა ნორმატივების თანახმად,რემონტი ყოველ 5 წელიწადში უნდა ჩატარდეს. იქ მასშტაბური სამუშაოებია ჩასატარებელი" — აღნიშნა ბასარიამ. მისი თქმით, აღდგენითი სამუშაოები დერივაციულ გვირაბში 2017 წლისთვის არის დაგეგმილი. "ამ სამუშაოების შესრულების დროს ჩვენ ენგურჰესის გაჩერება მოგვიწევს. იმის გამო, რომ მთელი ელექტროენერგია ამ გვირაბში გამავალი ჰიდრორესურსის ხარჯზე გამომუშავდება,იქ რემონტის ჩატარება ენგურჰესის გაჩერების გარეშე შეუძლებელი იქნება", — განმარტა ბასარიამ. მისი თქმით, დე ფაქტო აფხაზეთის მოსახლეობას ენერგომომარაგების პრობლემა არ ექნება, რადგან უკვე მიმდინარეობს კონსულტაციები, რემონტის პერიოდში დე ფაქტო აფხაზეთისთვის რუსეთიდან ელექტროენერგიის მიწოდების შესახებ.