გადაუღებელი წვიმების შედეგად 24-25 ივნისს გაგრის რაიონის სოფლებში 505 კერძო სახლი დაიტბორა, წერს “ სპუტნიკ აბხაზია“. გაგრის რაიონის ადმინისტრაციის ცნობით, 45 სახლის პირველი სართული მთლიანად წყალშია, ნაწილობრივ დაიტბორა 460 ეზო, წყლის ქვეშ აღმოჩნდა ასევე 40 ჰექტარი მიწის ნაკვეთი. ადმინისტრაციის წარმომადგენლის დაურ ჩიჩბას თქმით, სტიქიის მიზეზად ძლიერი ქარბორბალა იქცა, რომელმაც ადლერს გადაუარა. “ადლერის რაიონში მოვარდნილი ქარბობრალა ჩვენც შეგვეხო. ძლიერი წვიმების გამო 500-ზე მეტი ოჯახი დაზარალდა. ჩვენსა და მიმდებარე სოფლებში სანიაღვრე არხების პრობლემაა - არხები მთლიანად ნაგვითაა სავსე და გასაწმენდია. ამის გამო ძლიერი წვიმების დროს წყალი სახლებს ტბორავს”, - განაცხადა ჩიჩბამ.