დღეს სოხუმში ჟენევის დისკუსიების თანათავმჯდომარეებმა, დე ფაქტო აფხაზეთის საგარეო საქმეთა სამინისტროს ხელმძღვანელობასთან ჟენევის დისკუსიების მორიგ რაუნდთან დაკავშირებული საკითხები განიხილეს. შეხვედრის შემდეგ, რომელიც დახურულ კარს მიღმა მიმდინარეობდა, ფილიპ ლეფორმა (ევროკავშირი) , ანტი ტურუნენმა (გაერო) და ანდრეი ლეშიცამ (ეუთო), ჟურნალისტების კითხვებს უპასუხეს. აფხაზური მხარის მიერ ჟენევის დისკუსიების ფორმატის შეცვლის მოთხოვნასთან დაკავშირებულ კითხვაზე ფილიპ ლეფორმა უპასუხა, რომ საქმე ეხება არა ფორმატის შეცვლას, არამედ იმას, რომ დისკუსიები უფრო ეფექტურად წარიმართოს  და  პროდუქტიული გახდეს. „ცეცხლის შეწყვეტის შესახებ შეთანხმება გულისხმობს მუშაობას ორი მიმართულებით: ჰუმანიტარული,  უსაფრთხოებისა და სტაბილურობის,- აღნიშნა ლეფორმა. გაეროს წრმომადგენელმა ანტი ტურუნენმა კმაყოფილება გამოთქვა იმასთან დაკავშირებით, რომ გალის რ–ში უსაფრთხოებასთან დაკავშირებული სიტუაცია გაუმჯობესდა. „სამწუხაროდ, ამჟამად შეუძლებელია გალის ხუთმხრივი შეხვედრების ორგანიზება ინცინდენტების პრევენციისა და მათზე რეაგირების მექანიზმის ფარგლებში. მე ვისაუბრებ დისკუსიების მონაწილეებთან, იქნებ აღნიშნული დიალოგის გაგრძელების   რაიმე საშუალება გამოიძებნოს“. ჟენევის დისკუსიების ფორმატთან დაკავშირებით, დე ფაქტო საგარეო საქმეთა სამინისტროს წარმომადგენლის ირაკლი ხინთბას განცხადებით, აფხაზური მხარის შემოთავაზება ძალაში რჩება. "ჩვენ წინააღმდეგნი ვართ, ჟენევის დისკუსიები ორ დღეზე დიდხანს გაგრძელდეს, ყველაფერი შეიძლება ერთ დღეშიც მოგვარდეს. ერთის მხრივ, მუშაობა ორ სამუშაო ჯგუფში ჩატარდება, რაც შეესაბამება მედვედევ–სარკოზის მოლაპარაკებას... თუმცა ჩვენ თანმიმდევრულნი ვიქნებით ჩვენს წინადადებებში და დავიცავთ ჩვენს ხედვას. ", - აღნიშნა ხინთბამ.