"აბხაზჩაის" დირექტორმა ასტამურ ოტირბამ დე ფაქტო აფხაზეთის მთავრობის ხელმძღვანელი არტურ მიქვაბია კორუპციასა და გამომძალველობაში დაადანაშაულა. ოტირბას თქმით, მიქვაბიამ მას „წილში ჩასმის“ სანაცვლოდ პრობლემების გადაჭრაში დახმარება შესთავაზა. "იქნებ ის მეგობრულ დახმარებას გულისხმობდა, თუმცა, არა მგონია, რომ ეს ხუმრობა იყო , შედეგებიდან გამომდინარე, მან შემომთავაზა: : "… წილში ჩამსვი და შემდეგ ყველაფერს სწრაფად გადავწყვეტთო", — თქვა ოტირბამ. მისი თქმით, ტერიტორიები, სადაც ჩაის მოყვანა იგეგმება, უკვე განსაზღვრულია, თუმცა, მეჩაიეობის დარგის განვითარების საკითხების განხილვას „მთავრობა“ აჭიანურებდა. ოტირბა თვლის, რომ ამაში უშუალოდ პრემიერ-მინისტრს მიუძღვის ბრალი. მან თქვა, რომ შეხვედრაზე, სადაც სამომავლო გეგმები უნდა განეხილათ, მიქვაბიამ პირდაპირ უთხრა, რომ „აბხაზჩაის" პრობლემები გადაწყდება იმ შემთხვევაში, თუ სახელმწიფო კომპანია მას შემოსავლებს გაუნაწილებს. არტურ მიქვაბიამ უარყო აღნიშნული ბრალდებები და განაცხადა, რომ ცილისწამებისთვის სასმართლოში იჩივლებს . მან თქვა, რომ ოტირიბას განცხადება „ანგაჟირებულია და პოლიტიკურ ქვეტექსტებს შეიცავს“.