ჟენევაში, სამხრეთ კავკასიის უსაფრთხოებისა და სტაბილურობის თემაზე საერთაშორისო დისკუსიების 32-ე რაუნდის მსვლელობის დროს, ქართულმა მხარემ აფხაზეთს მორიგი ციფრული ფორმატის საარქივო დოკუმენტები გადასცა, წერს „სპუტნიკი” დე ფაქტო აფხაზეთის საგარეო უწყებაზე დაყრდნობით. “მხარეთა შორის მიღწეულია შეთანხმება, რომ ჟენევის დისკუსიების ფარგლებში ამ მიმართულებით მუშაობა გაგრძელდეს,”- ნათქვამია სამინისტროს განცხადებაში. დისკუსიების ფარგლებში უსაფრთხოების საკითხებზე მომუშავე ჯგუფის მონაწილეებმა განიხილეს საკითხები, როგორებიცაა ძალის არგამოყენება, აფხაზეთისა და სამხრეთ ოსეთის მოქალაქეების ჰუმანიტარული უფლებების უზრუნველყოფა, საერთაშორისო ურთიერთობებისთვის ბარიერის მოხსნა და ევროკავშირის სავიზო პოლიტიკასთან დაკავშირებული საკითხები. გამოცემის ინფორმაციით, ჰუმანიტარულ საკითხებზე მომუშავე ჯგუფს, , აფხაზეთის კულტურული მემკვიდრეობის დაბრუნების პროგრამის ფარგლებში,აფხაზურმა მხარემ საარქივო მასალებისა და ტექნიკური დოკუმენტების ნუსხა წარუდგინა.