დე ფაქტო აფხაზეთის საგარეო საქმეთა სამინისტრო ერევანში გამართული საერთაშორისო ტურნირიდან აფხაზი სპორტსმენების მოხსნას გამოეხმაურა, - წერს აფხაზური მედია. აღნიშნულ განცხადებაში სამინსტროს წარმომადგენლები შეშფოთებას გამოთქვამენ,მათი თქმით, მოძმე სომხეთში მომხდარ ფაქტთან დაკავშირებით“. „სომხეთის ხელისუფლებისა და ტურნირის ორგანიზატორების გადაწყვეტილებას, რომელიც ქართველი „მიმინოების“ სურვილს დაჰყვა, ძნელია გამართლება მოუძებნო. ქართული მხარის მცდელობით, ნებისმიერი საშუალებებით ხელი შეუშალოს აფხაზი სპორტსმენების საერთაშორისო ტურნირებში მონაწილეობას, გრძელდება აფხაზი ხალხის იზოლაციის პოლიტიკა და პრაქტიკაში მტკიცდება ის , რომ ქართველი პოლიტიკოსების დემაგოგიური განცხადებები კონსტრუქციულ დიალოგსა და ღია ურთიერთობებზე ჩალის ფასადაც არ ღირს“,- ნათქვამია განცხადებაში. დე ფაქტო აფხაზეთის საგარეო უწყება გმობს აფხაზეთის გარე სამყაროსთან კონტაქტების დამყარებისთვის მიზანმიმართულად წინააღმდეგობის გაწევას და აცხადებს, რომ ერევანში მომხდარი ინციდენტი აუცილბელად იქნება იმ საკითხთა სიაში, რომელთა განხილვა დეკემბერში დაგეგმილ ჟენევის საერთაშორისო დისკუსიების დროს იგეგმება. თავისუფალ ჭიდაობაში საერთაშორისო ტურნირი სომხეთის დედაქალაქში 21-23 ოქტომბერს გაიმართა. მასში საქართველოს, ირანის, დაღესტნის, ინგუშეთის, ჩრდილოეთ ოსეთის, აზერბაიჯანისა და უკრაინის სპორტსმენები მონაწილეობდნენ. აფხაზური მედიის ცნობით, აფხაზი სპორტსმენები ტურნირიდან საქართველოს საელჩოს ძალისხმევით მოხსნეს.