წალენჯიხის მუნიციპალიტეტში დიდთოვლობის შედეგად მიყენებულ ზარალს სპეციალური კომისია ითვლის. წალენჯიხის გამგებლის გოგა გულორდავას განცხადებით, ზარალმა შესაძლოა 300 ათას ლარს მიაღწიოს.

მისივე ინფორმაციით, მუნიციპალიტეტის მასშტაბით, 12 კერძო სახლი, 2 ადმინისტრაციული შენობა, 2 საბავშვო ბაღი და 5 კორპუსი დაზიანდა. რაც შეეხება საავტომობილო გზებს, გამგებლის ცნობით, პრობლემად რჩება ორი სოფლის - ჭალესა და სამიქაოს საავტომობილო გზები.

„აღნიშნულ სოფლებში გაწმენდითი სამუშაოები ამ წუთებშიც მიმდინარეობს. ზარალის დათვლის შემდეგ მონაცემებს ცენტრალურ მთავრობაში გავაგზავნით. ადგილობრივი ბიუჯეტით ზარალის აღმოფხვრას ვერ შევძლებთ. ჩვენი სარეზერვო ფონდი სულ 50 ათასი ლარია“, - აღნიშნა გოგა გულორდავამ.