ჩხოროწყუს მუნიციპალიტეტის გამგეობაში მუნიციპალიტეტის ტერიტორიაზე მცხოვრები სოციალურად დაუცველი მოქალაქეების, გაუსაძლის პირობებში მყოფი ოჯახებისა და სხვადასხვა სოციალური პრობლემის შემსწავლელი სამუშაო ჯგუფი შეიქმნა, რომელიც ჯგუფი ადმინისტრაციულ ერთეულებში გამგებლის წარმომადგენლებისა და დეპუტატების მონაწილეობით სწავლობს და ავლენს ისეთ ოჯახებს, რომლებსაც ახალი სახლის აშენება ან არსებულის რეაბილიტაცია სჭირდებათ.

როგორც რადიო „ათინათს“ გამგეობიდან აცნობეს, ამჟამად 13–ვე ადმინისტრაციულ ერთეულში ჯგუფის მიერ შესწავლილი და გამოვლენილია ზემოთაღნიშნული კატეგორიის 46 ოჯახი, რომელთაგან ყველაზე მძიმე მდგომარეობაში მყოფთ შესაბამისი დახმარება გაეწევათ.

როგორც „ათინათთან“ საუბრისას ჩხოროწყუს გამგებელი დავით გოგუა განმარტავს, მისი უწყება მიმდინარე წელს ახალ სახლს მინიმუმ 10 ოჯახს აუშენებს.
„რამდენიმე ოჯახი უკვე შერჩეულია, თუმცა პროცესი ჯერ არ დასრულებულა. ჩვენ ვარჩევთ ყველაზე გაჭირვებულ ოჯახებს და პირველ რიგში მათ დავეხმარებით“, - აღნიშნა გოგუამ.

2016 წელს უკიდურესად გაუსაძლის საბინაო პირობების მქონე სოციალურად დაუცველი ოჯახების საცხოვრებელი სახლების ასაშენებლად და სარეაბილიტაციოდ ადგილობრივი ბიუჯეტიდან 60 000 ლარია გამოყოფილი. სტიქიის შედეგების სალიკვიდაციოდ კი - 50 000 ლარი.