დაღუპულთაგან 28 წლის კაპრალი ვლადიმერ შანავა  წალენჯიხის მკვიდრია. ავღანეთის საერთაშორისო მისიაში მონაწილე ქართველი სამხედროების ბაზაზე გუშინ, აქამდე ყველაზე მასშტაბური ტერორისტული თავდასხმა განხორციელდა . როგორც გუშინ საღამოს გამართულ საგანგებო ბრიფინგზე თავდაცვის მინისტრმა ირაკლი ალასანიამ განაცხადა, შემთხვევა ჰელმანდის პროვინციაში, ბაზა "შირგაზზე" 16:17 საათზე მოხდა. მინისტრის ინფორმაციით, თვითმკვლელმა ტერორისტმა და მეამბოხეთა ჯგუფმა 42-ე ბატალიონის ბაზაზე იერიში მიიტანა. "ინფორმაციის მიღებისთანავე გაერთიანებული შტაბების ხელმძღვანელობას მივეცი დავალება ბოლომდე დაედგინათ და დაეზუსტებინათ შემოტევის დეტალები. უკვე მიღებულია უსაფრთხოების საგანგებო ზომები. მე ვესეუბრე 42-ე ბატალიონის მეათურ მაიორ კალანდაძეს, მოცემული დროისთვის ცნობილია შემდეგი: ბაზაზე განხორციელდა მეამბოხეთა კომბინირებული თავდასხმა თვითმკვლელი ტერორისტის მიერ სატვირთო მანქანაზე დამონტაჟებული ასაფეთქებელი მოწყობილობის გამოყენებით. დაღუპულია 3 ქართველი სამხედრო მოსამსახურე",-აცხადებს ირაკლი ალასანია. მისივე ინფორმაციით, თავდასხმა ქართველმა სამხედროებმა მოიგერიეს, ყველა ტერორისტი ადგილზე გაანადგურეს და ამ დროისთვის სრულად აკონტორლებენ ოპერატიულ ვითარებას მათი პასუხისმგებლობის ზონაში. „დიდი მწუხარებით მინდა აღვნიშნო, რომ თავდასხმას შეეწირა 3 ქართველი მოსამსახურე კაპრალი ალექსანდრე კვიწინაძე, უმცროსი სერჟანტი ზვიად დავითაძე და კაპრალი ვლადიმერ შანავა. მინდა, მივუსამძიმრო ამ გმირი სამხედროების ოჯახებს ეს აუნაზღაურებელი დანაკლისი და მთელ საქართველოს ეს ტრაგედია",-განაცხადა თავდაცვის მინისტრმა. სამინისტროს ინფორმაციით, ამ ეტაპზე არსებული მონაცემებით არიან დაჭრილები და მსუბუქად დაშავებულები. ყველა დაჭრილის ოჯახის წევრი ინდივიდუალურად ინფორმირებულია.