დე ფაქტო აფხაზეთის პარლამენტის დეპუტატები რობერტ იაილიანი და ლევონ გალუსტიანი გარე ძალების მიერ აფხაზებისა და სომხების დაპირისპირების მცდელობაზე საუბრობენ.

დასტურად მათ მოყავთ ონლაინ-გამოცემა "კავკაზ პლიუსში" გამოქვეყნებული სომხური ორგანიზაცია "კრუნკის" განცხადება, რომელშიც ნათქვამია, რომ "თვითაღიარებული აფხაზეთის რესპუბლიკაში სომხური ეროვნულ -კულტურული ავტონომიის შექმნა იგეგმება, რომლის პროექტი განსახილველად დეპუტატებს იალიანსა და გალუსტიანს გადაეცემათ".

პარლამენტარების მტკიცებით, ეს განცხადება სიცრუეა, მათი თქმით, "აფხაზ და სომეხ მოძმე ხალხებს შორის შუღლის ჩამოგდების მცდელობა განწირულია მარცხისთვის".

"ჩვენ ვაცნობიერებთ, რომ ამ ქმედებების უკან დგანან დამოუკიდებელი აფხაზური სახელმწიფოს შექმნის იდეის მოწინააღმდეგეები.
პერიოდულად, მედია, განსაკუთრებით ის, რომელიც ენგურის მარცხენა სანაპიროზე მაუწყებლობს, აქვეყნებს პროვოკაციული ხასიათის მასალებს",- აღნიშნავენ დეპუტატები.

ისინი აცხადებენ, რომ "კრუნკი", რომლის სახელითაც გავრცელდა განცხადება, შეუძლებელია ამგვარი ინიციატივის ავტორი იყოს, რადგან ორგანიზაციის აქტივისტები "აფხაზ ძმებთან ერთად იბრძოდნენ თავისუფლებისა და დამოუკიდებლობისათვის".