აფხაზეთის დე-ფაქტო საგარეო საქმეთა მინისტრმა ირაკლი ხინთბამ ფანტაზია უწოდა საქართველოს პრეზიდენტის მიხეილ სააკაშვილის სიტყვებს იმის შესახებ, თითქოს ვანუატუს პრემიერმა მას აფხაზეთის დამოუკიდებლობის აღიარების გადაწყვეტილების გაუქმების შესახებ აცნობა, - წერს „აბხაზსკი უზელ“. "მართლაც, ვანუატუს მთავრობაში არსებობს განსხვავებული აზრები აფხაზეთის დამოუკიდებლობის აღიარებასთან დაკავშირებით, თუმცა ჩვენს ქვეყნებს შორის დიპლომატიური ურთიერობების გაწყვეტის გადაწყვეტილება არ მიღებულა“, - აღნიშნა ხინთბამ. დიპლომატის სიტყვებით, ვანუატუს პრემიერმა გამოთქვა საკუთარი მოსაზრებ , რომელიც ამ ქვეყნის ოფიციალურ პოზიციას არ ემთხვევა. ირაკლი ხინთბამ დასძინა, რომ ვანუატუ დღეს სოხუმთან მისი ურთიერთობის მოწინააღმდგეთა მხრიდან ზეწოლას განიცდის. „აფხაზეთის საგარეო საქმეთა სამინისტრო პოლიტიკურ-დიპლომატიური პროვოკაციების თავიდან ასაცილებლად , თავისი შესაძლებლობების ფარგლებში ყველა საჭირო ღონეს ხმარობს ", - აღნიშნა ხინთბამ. ვანუატუს მიერ აფხაზეთის დამოუკიდებლობის აღიარების გადაწყვეტილების გაუქმების შესახებ ინფორმაცია საქართველოს პრეზიდენტის ადმინისტრაციამ ორშაბათს გაავრცელა.