წალენჯიხა-ჩხოროწყუს გაერთიანებული საარჩევნო ოლქის მაჟორიტარობის კანდიდატად „ნაციონალური მოძრაობიდან“ მოქმედი პარლამენტარი ლევან ქარდავა დასახელდა. მოსახლეობას ქარდავა "ენმ"-ს ერთ-ერთმა ლიდერმა დავით ბაქრაძემ წარუდგინა. პარტიის სხვა ლიდერებთან ერთად წალენჯიხაში ზუგდიდის მუნიციპალიტეტის მაჟორიტარი დეპუტატობის კანდიდატი სანდრა რულოვსიც იმყოფებოდა.

ქარდავას თქმით, 2012 წლის არჩევნების შედეგის მიუხედავად, ძალინ ბევრს ჰქონდა იმედი, რომ ქვეყანა წინსვლას გააგრძელებდა, „სამწუხაროდ, „ოცნების“ მთავრობამ იმდენი მოახერხა, რომ ეს წარმატებები გააფერკმთალა“. საქართველოს სჭირდება ხელისუფლება, რომელიც დიდი საგარეო გამოწვევების მიუხედავად იპოვის გზას და ქვეყანას განავითარებს.

მან ასევე გაიხესენა 2012 წელი, როცა პოლიტიკაში მოსვლა გადაწყვიტა.

„პოლიტიკაში არ მოვსულვარ, როგორც პარტიის წარმომადგენელი. მაშინდელი ჩემი დაპირება კარგად მახსოვს, რასაც ხალხთან ყოველ შეხვედრაზე ვიმეორებდი, რომ პარლამენტში რომელიმე პარტიის კი არა, წალენჯიხის წარმომადგენელი ვიქნებოდი. ოთხი წლის განმავლობაში, ამ პირობის ერთგული ვარ. ამ ხნის განმავლობაში, ადგილობრივი და ცენტრალური ხელისუფლებისთვის ხშირად მითქვამს, მნიშვნელობა არ აქვს, უმცირესობაში ვიქნები თუ უმრავლესობაში, იქ ვდაგვარ, სადაც ჩემი წალენჯიხის ინტერესებია და თუ ვერაფერში დაგეხმარებით, ხელს მაინც არ შეგიშლით-მეთქი. ხელისუფლებას თანამშრომლობისთვის ხელიც გავუწოდე, რადგან პასუხისმგებლობა მქონდა ხალხის წინაშე, მაგრამ ამ მთავრობას თანამშრომლობა და საქმის კეთება არ უნდოდა. ამ მთავრობას დაჩოქილი, პორტირებული ადამინები უნდოდა, რომლებიც იმას გააკეთებდნენ, რაც „ოცნებას“ ენდომებოდა. ჩემთვის კი, უზენაესი იყო და არის არა პარტიული და პირადი ინტერესები, არამედ, ქვეყნის განვითარება. საქართველოს არ აქვს ფუფუნება, შეინახოს მთავრობა, რომელიც თავის მართლებითაა დაკავებული, თუ რატომ ვერ აკეთებს საქმეს.“

ლევან ქარდავა 2012 წლიდან დღემდე საქართველოს პარლამენტის წევრი და წალენჯიხის მუნიციპალიტეტის მაჟორიტარი დეპუტატია.