გამყოფ ხაზთან მდებარე სოფელ რუხში, ადგილობრივებს სოფლის განვითარების კონცეფცია ზუგდიდის გამგებლის მოადგილე მამუკა წოწერიამ, სამეგრელო-ზემო სვანეთის სამხარეო ადმინისტრაციის რეგიონული პროექტების კოორდინირების სამსახურის უფროსმა დავით კოდუამ და რუხის სავაჭრო ცენტრის დირექტორმა დავით მაჭავარიანმა გააცნეს.

ამჟამად რუხში აფხაზეთთან დამაკავშირებელი მთავარი ხიდის რეაბილიტაცია მიმდინარეობს. სამშენებლო სამუშაოებს გაეროს განვითარების პროგრამა აფინანსებს.

წოწერიას განმარტებით, უახლოეს პერიოდში ასევე დაგეგმილია ხიდის მიმდებარედ ინფრასტრუქტურის მოწყობა. კერძოდ, აშენდება ახალი ავტოსადგომი, მოსაცდელები, სკვერი, სველი წერტილები, დაიგება ახალი გზის საფარი.

გარდა ამისა, ადგილობრივი მთავრობა რუხის ისტორიული ციხესიმაგრის დატვირთვას სხვადასხვა ახალგაზრდული, სპორტული, მუსიკალური და ფოლკლორული ღონისძიებებით გეგმავს.

"მოხდება რუხის ციხის ინფრასტრუქტურის მოწესრიგება და მისი ღია საგამოფენო სივრცედ გამოყენება. ამავდროუად სოფელში მექანიზატორის ცენტრი აშენდება, სადაც უახლესი სასოფლო-სამეურნეო ტექნიკა განთავსდება. ცენტრის შექმნის შემდეგ 50 ადგილობრივი დასაქმდება ", - აღნიშნა წოწერიამ.

ამასთან, რუხში მიმდინარეობს საუნივერსიტეტო კლინიკის მშენებლობა, რომელიც 220 საწოლზეა გათვლილი. პროექტის განხორციელებისთვის სახელმწიფო ბიუჯეტიდან 41 264 000 ლარი იხარჯება. სამუშაოებზე 154 ადამიანია დასაქმებული. კომპლექსი 7 ბლოკისა და სხვადასხვა ტიპის საინჟინრო-ტექნიკური ნაგებობებისგან შედგება. საავადმყოფო რეგიონის მოსახლეობას და ოკუპირებულ აფხაზეთში მცხოვრებ მოქალაქეებს მოემსახურება.