ისტორიული პარკების ევროპული ქსელის წევრები ზუგდიდის დადიანების ბაღს სამუშაო მისიით ესტუმრნენ. „ამ ბაღს დიდი პერსპექტივა აქვს. როგორც ჩანს, ისტორიულად, დიდი მნიშვნელობის იყო. ჩვენ გაგიზიარებთ გამოცდილებას და ვიმედოვნებთ, რომ სათანადო აღდგენითი სამუშაოების დასრულების შემდეგ ეს მშვენიერი ბაღი ევროპის ისტორიული პარკების წევრი გახდება“, - აღნიშნა EGHN გამგეობის თავმჯდომარემ, ლანდშაფტის არქიტექტორმა ჯენს სპანჯერმა.

ევროპელ სპეციალისტებთან ერთად ბოტანიკურ ბაღში საქართველოს კულტურული მემკვიდრეობის დაცვის ეროვნული სააგენტოს უფროსი ნიკოლოზ ანთიძე, ზუგდიდის მერი ირაკლი გოგოხია და ადგილობრივი ხელისფლების წარმომადგენლები იმყოფებოდნენ.

სამუშაო ვიზიტის ფარგლებში, ექსპერტები, მათი გამოცდილებისა და საერთაშორისოდ აღიარებული პრაქტიკის საფუძველზე, რეკომენდაციების სახით დაეხმარებიან ქართულ მხარეს კონკრეტული პროექტების მომზადებასა და საკანონმდებლო რეგულაციების შემუშავებაში.