ანაკლიის პორტის მშენებლობასთან დაკავშირებით, განსახლების სამოქმედო გეგმის შექმნაზე მომუშავე კომპანია „გეგოგრაფიკის“ წარმომადგენლებს სამეგრელო-ზემო სვანეთის გუბერნატორი ლევან შონია შეხვდა. სამუშაო შეხვედრაზე სახელმწიფო რწმუნებულმა ამ დროისთვის არსებულ მონაცემებზე ამომწურავი ინფორმაცია მიიღო.

ამჟამად, კომპანიის მიერ უკვე აღწერილი მონაცემების გადამოწმება მიმდინარეობს. ამ დროისთვის 519 ნაკვეთი და 60-ზე მეტი საცხოვრებელი სახლია აღწერილი, რომელიც განსახლების გეგმაში შევა. კომპანიამ ის მიწის ნაკვეთები და შენობა- ნაგებობები აღწერა, რომლებიც ანაკლიის ღრმაწყლოვანი პორტის და მისი ინფრასტრუქტურის ფარგლებში ექცევა.

განსახლების გეგმის შემუშავება, მიწის ყიდვა და კომპენსაციების გაცემა საქართველოს კანონმდებლობის შესაბამისად, საბაზრო ღირებულებით და საერთაშორისო საფინანსო ინსტიტუტების, კერძოდ კი, ევროპის რეკონსტრუქციისა და განვითარების ბანკის (EBRD) ნორმების მიხედვით მოხდება.

გუბერნატორის განცხადებით, არცერთი მესაკუთრე შესაბამისი კომპენსაციის გარეშე არ დარჩება და დრო, როდესაც მოქალაქეებს მიწებს და საკუთრებას ართმევდნენ, წარსულს ჩაბარდა.

შეხვედრას გუბერნატორის ადმინისტრაციის რეგიონული პროექტების კოორდინირების სამსახურის უფროსი, ზუგდიდის მუნიციპალიტეტის გამგეობის, ეკონომიკის სამინისტროს, სოციალური მომსახურების სააგენტოს, საჯარო რეესტრის წარმომადგენლები და ანაკლიის რწმუნებული ესწრებოდნენ.