ჟენევის დისკუსიებს აფხაზეთისთვის დადებითი არაფერი მოაქვს, ამის შესახებ დე ფაქტო რესპუბლიკის პრეზიდენტმა რაულ ხაჯიმბამ ჟურნალისტებისთვის გამართულ პრესკონფერენციაზე განაცხადა.

„ახლახან შევხვდი ხალხს, რომელიც ჟენევის ფორმატს წარმოადგენს. ჩვენ ვისაუბრეთ და ვფიქრობ, შევთანხმდით იმაზე, რომ ჟენევის დისკუსიები მხოლოდ მსოფლიოს საზოგადოებრიობამდე ჩვენი პოზიციების მიტანის შესაძლებლობაა. მეტი არაფრისთვის გვჭირდება ეს ფორმატი.“

მისი განმარტებით, აფხაზეთის ხალხმა, ეროვნული შემადგენლობის მიუხედავად, ყველა იმ უფლებით უნდა ისარგებლოს, რომელიც საერთაშორისო სამართლის ნორმებშია ჩადებული.

შესაბამის კითხვაზე პასუხისას, ხაჯიმბამ აღნიშნა, რომ გალის რაიონის მოსახლეობის პასპორტიზაციის და მათთვის ბინადრობის უფლების მინიჭების პროცესი გაჭიანურდა, რადგან, „ის მოსალოდნელზე უარესი სცენარით წარიმართა და ადგილი ჰქონდა უხეშ დარღვევებს", ამასთან, მან ხაზი გაუსვა იმას, რომ, გალის რაიონის მცხოვრებლები, რომლებიც "საომარ მოქმედებებში არ მონაწილეობდნენ და ამ ტერიტორიაზე მუდმივად ცხოვრობდნენ, განცხადების შეტანის საფუძველზე, მოქალაქეობის მიღებას შეძლებენ“.

საუბარი ასევე შეეხო აფხაზეთ - სამეგრელოს ადმინისტრაციულ საზღვარზე განთავსებულ გამშვებ პუნქტებს. ხაჯიმბას თქმით, ევროპული სტრუქტურების წარმომადგენლებს, მათ შორის ჟენევის დისკუსიებზე, განეცხადათ, რომ დაიხურება ყველა საგუშაგო, გარდა ძირითადისა, რომელიც ენგურის ხიდზეა განლაგებული. მისი თქმით, ეს შეამცირებს დანაშაულებათა რიცხვს, მათ შორის კონტრაბანდის გადატანის შესაძლებლობას.