რუსეთის სამხრეთის სამხედრო ოლქის პრესსამსახური საქართველოს პრეზიდენტის გიორგი მარგველაშვილის მიმართვას გამოეხმაურა და განაცხადა, რომ რუსეთის თავდაცვის სამინისტრო არ გეგმავს აფხაზეთის სოფელ წებელდაში სამხედრო პოლიგონის აშენებას და იქ არავითარ სამუშაოებს არ აწარმოებს.

შეგახსენებთ, რომ საქართველოს პრეზიდენტმა საერთაშორისო თანამეგობრობას, იუნესკოს და სხვა საერთაშორისო ორგანიზაციებს მიმართა, სათანადოდ შეაფასონ რუსეთის ფედერაციის მიერ საქართველოს ტერიტორიაზე განხორციელებული უკანონო ქმედებები. „გამოვხატავთ უკიდურეს აღშფოთებას რუსეთის ფედერაციის საოკუპაციო ძალების მიერ აფხაზეთში, სოფელ წებელდაში, ისტორიული მემკვიდრეობის ძეგლების განადგურებასთან დაკავშირებით. სამხედრო პოლიგონის მოწყობის მიზნით რუსეთის ფედერაციის შეიარაღებულმა ძალებმა დაანგრიეს მე-19 საუკუნის ეკლესია და პოლონელთა ისტორიული სასაფლაო“, - ნათქვამია განცხადებაში.

მანამდე აფხაზურ მედიაში გავრცელდა ინფორმაცია იმის შესახებ, რომ სოფელ წებელდაში მე-19 საუკუნის ბოლოს აგებული ეკლესია და პატარა სასაფლაო გაანადგურეს. ამავე ცნობით, ისტორიულ - კულტურული მემკვიდრეობის რეესტრში რეგისტრირებული ტაძარი, ოდესღაც, წებელდაში კომპაქტურად ჩასახლებულმა პოლონელებმა ააგეს. იქვე იყო მათი სასაფლაოც. ამ დროისთვის, ეკლესიის ფუნდამენტი და ნანგრევების ფრაგმენტები იყო შემორჩენილი.

2011 წელს დე ფაქტო მთავრობის გადაწყვეტილებით, სოფელ წებელდის მიმდებარე ტერიტორია, რუსეთის სასაზღვრო სამმართველოსთან ერთობლივი სწავლებების ჩასატარებლად, “თავდაცვის სამინისტროს” გადაეცა, რომლის განკარგულებით, 3 იანვარს, მომავალი პოლიგონის ტერიტორიაზე ეკლესია და სასაფლაო ბულდოზერით მიწასთან გაასწორეს.