სახელმწიფო უსაფრთოხების სამსახური აფხაზეთში დაკავებულ გიორგი ლუკავასთან დაკავშირებით გავრცელებულ ინფორმაციას ეხმიანება. უწყების განცხადებაში აღნიშნულია, რომ ლუკავას შესახებ  ცნობა უკვე მიეწოდა ევროკავშირის მონიტორინგის მისიას და გააქტიურდა ცხელი ხაზიც. სუსის წარმომადგენლობაში ასევე განმარტავენ, რომ მისი ციხიდან გაყვანის ფაქტს ოკუპირებული აფხაზეთის ხელისუფლება არ ადასტურებს.

ლუკავას ოჯახის წევრები თავის მხრივ ამბობენ, რომ დაკავებული მათ ტელეფონით დაუკავშირდა და მიაწოდა ინფორმაცია, რომ თითქოს გაცვლის შესახებ შეთანხმება მიღწეულია. თუმცა, ოჯახისვე ინფორმაციით, სატელეფონო ზარის შემდგომ პატიმარი დაიკარგა. 

„დაგვირეკა და გვითხრა, რომ გავყავართ, მაგრამ არ ვიცი რა მიმართულებით, მეშინია და წითელი ჯვარი ჩართეთო. ამის შემდეგ ვცდილობ და ვერ ვრეკავ, არ ვიცით სად არის წაყვანილი. გვეშინია, რომ არ მოკლან. ჩვენ ხელთ არსებული ინფორმაციით, გალის უშიშროების მინისტრის მოადგილეს ჰყავს ის ციხიდან გამოყვანილი“, - განუცხადა მეუღლე ლალი ლუკავამ  ტელეკომპანია „რუსთავი 2“-ს.

აფხაზეთის ომის მონაწილე გიორგი ლუკავა ოკუპირებულ ტერიტორიაზე 5 წლის წინ დააკავეს და ის სასჯელს დრანდის ციხეში იხდიდა. მისი ოჯახი ვითარებაში გარკვევას და დახმარებას ხელისუფლებას სთხოვს.

გალში ინციდენტების პრევენციისა და მათზე რეაგირების მექანიზმის ფარგლებში ქართულ მხარეს არაერთხელ დაუყენებია უკანონო პატიმრობაში მყოფი საქართველოს მოქალაქე გიორგი ლუკავას საკითხი.