დე ფაქტო აფხაზეთის შს მინისტრის ბატალ კობახიას განცხადებით, 27 მარტს პასპორტების შეცვლის პროცესი განახლდება. აფხაზური მედიის ცნობით, ეს პროცედურები დროებით, საარჩევნო კამპანიის გამო შეწყდა. ამასთან, კობახიას თქმით, „აფხაზეთის რესპუბლიკის“ ვადაგასული პასპორტით სარგებლობა 5 აპრილამდე იქნება შესაძლებელი.

„ერთი დღის განმავლობაში ჩვენ მთელი აფხაზეთის მასშტაბით 500 პასპორტის დამუშავებას, ხოლო ერთ თვეში – 10 - დან 12 ათასამდე პასპორტის გაცემას შევძლებთ, წლის ბოლომდე ახალ პასპორტს 100 ათასი ადამიანი მიიღებს.“, - აღნიშნა კობახიამ.

გარდა ამისა, დე ფაქტო რესპუბლიკის შს მინისტრის განცხადებით, უახლოეს დღეებში იმ პირებზე, ვინც „აფხაზეთის მოქალაქეები არ არიან, ბინადრობის უფლების დამადასტურებელი დოკუმენტები გაიცემა“.

ცნობისთვის, სოხუმმა ახალი ტიპის პასპორტების გაცემა სექტემბერში დაიწყო. კობახიამ მაშინ განმარტა, რომ „ახალი პასპორტის მიღება შეუძლია ნებისმიერ მოქალაქეს, რომელსაც არ სჭირდება ჩაწერა, უბრალოდ, ის აბარებს ძველ პასპორტს და მის ნაცვლად იღებს ახალს".