ზუგდიდელი რევაზ ჯინჯოლავა ზუგდიდის საპატრული პოლიციის თანამშრომელს ფიზიკურ შეურაცხყოფაში ადანაშაულებს. ის საგზაო მოძრაობის დარღვევისთვის ცენტრალური ბაზრის მიმდებარე ტერიტორიაზე გააჩერეს და განუმარტეს, რომ 26 მაისის აღსანიშნავ ღონისძიებებთან დაკავშირებით გადაკეტილ საავტომობილო გზაზე მანქანით გაიარა. მოქალაქესა და პატრულის ეკიპაჟის წევრებს შორის სიტყვიერი დაპირისპირება მას შემდეგ დაწყო, რაც, ჯინჯოლავას ცნობით, მან პოლიციებს თხოვა, თუკი ჯარიმის გამოწერას აპირებდნენ, ეს სწრაფად გაეკეთებინათ, რადგან სახლში წამლის დასალევად ეჩქარებოდა.

„ამ დროს ხელბორკილები დამადეს და წამიყვანეს. სამმართველოს ეზოში რომ შემიყვანეს, ვკითხე, რატომ დამიჭირეთ, რა დავაშავე-მეთქი. ამ დროს ერთ-ერთმა პოლიციელმა სახეში ხელი გამარტყა. იქვე იყო უფროსიც, რომელსაც ვუთხარი, რატომ გამარტყეს ხელი-მეთქი. მან კი თქვა, რომ მე ვიტყუებოდი და კამერაში უნდა ჩავესვით“, - აღნიშნა ჟურნალისტებთან ჯინჯოლავამ.



მისივე თქმით, ამ დროს შეუძლოდ გახდა და სასწრაფო სამედიცინო დახმარების გამოძახება გახდა საჭირო, რის შემდეგაც საავადმყოფოში გადაიყვანეს. ჯინჯოლავას ინფორმაციით, ამ ფაქტს თვითმხილველებიც ჰყავს, თუმცა, სასამართლოზე დღეს ისინი არ წარმოდგენილან. გარდა ამისა, სასამართლომ, მოთხოვნის მიუხედავად, კამერების ვიდეო-ჩანაწერები ვერ მოიპოვა, რადგან, სამართალდამცავების ინფორმაციით, ისინი გათიშული იყო.

ზუგდიდის რაიონულმა სასამართლომ რევაზ ჯინჯოლავა ადმინისტრაციული სამართალდარღვევისთვის 500 ლარით დააჯარიმა. მას, ჯერჯერობით, ადვოკატი არ ჰყავს, თუმცა მის აყვანას გეგმავს. ჯინჯოლავას თქმით, მან პოლიციის მხრიდან ფიზიკური შეურაცხყოფის საქმეზე გენერალურ ინსპექციას უკვე მიმართა.

შს სამინისტროში რადიო „ათინათს“ განუცხადეს, რომ ჯინჯოლავას წინააღმდეგ საქმე 166-ე (წვრილმანი ხულიგნობა)და 173-ე მუხლით (პოლიციელისკანონიერი მოთხოვნისადმი დაუმორჩილებლობა) აღიძრა.
„მან გადაკეტილ გზაზე მოითხოვა მანქანით გავლა, რისი უფლებაც, სამართალდამცავებმა, ცხადია, არ მისცეს. მოქალაქე კი პოლიციის მითითებას არ დაემორჩილა. რაც შეეხება დამატებით ინფორმაციას, მას შეუძლია გენ-ინსპექციას მიმართოს“, - განმარტეს შსს-ში.

რევაზ ჯინჯოლავა აცხადებს, რომ მან აღნიშნულ საქმესთან დაკავშირებით სახალხო დამცველის აპარატს უკვე მიმართა.