ზუგდიდის დემოკრატიული ჩართულობის ცენტრში ადამიანის უფლებათა დაცვის საკითხებზე საინფორმაციო შეხვედრა გაიმართა, რომელსაც მთავრობის ადმინისტრაციის ადამიანის უფლებათა დაცვის სამდივნოს წარმომადგენლები უძღვებოდნენ.

სპიკერებმა ადამიანის უფლებათა დაცვის ეროვნული სტრატეგიის იმ ძირითად საკითხებზე გაამახვილეს ყურადღება, რაც ადგილობრივი მოსახლეობისთვის განსაკუთრებული ინტერესის საგანია. შეხვედრაზე დამსწრეებმა კითხვები დევნილთა და ოკუპირებულ ტერიტორიებზე მცხოვრებთა უფლებრივი მდგომარეობის შესახებ დასვეს. კითხვები ეხებოდა ხურჩაში ამბულატორიის გახსნას, ასევე, საოკუპაციო ხაზის ახლოს მდებარე სოფლებში კრიზისული ცენტრებისა და პატრულირების აუცილებლობასა და განათლების საკითხს.

ადამიანის უფლებების დაცვის სამდივნოს მრჩევლის ნატალია ჯალიაშვილის თქმით, სამოქმედო გეგმაში აღნიშნულთან დაკავშირებით სპეციალური თავი მზადდება.

„მიუხედავად იმისა, რომ ამ კუთხით სხვადასხვა ღონისძიებები ტარდება, მაგალითად, განსახლების საკითხი. გამოწვევები მაინც რჩება, მათ შორის თემში საფუძვლიანი ინტეგრაცია. სამწუხაროდ, ჩვენ ოკუპირებულ ტერიტორიაზე ეფექტიან კონტროლს ვერ ვახორციელებთ, თუმცა, ბუნებრივია, დღეს მოსმენილი ყველა პრობლემა მაქსიმალურად სწრაფად იქნება საერთაშორსიო თანამეგობრობის ყურამდე მიტანილი“, - აღნიშნა ჯალიაშვილმა.

პროექტი „ადამინის უფლებების საკითხებზე ინფორმაციის გაცვლის პროცესის გაუმჯობესება ცენტრსა და რეგიონებს“ შორის მიმდინარე წლის თებერვალში დაიწყო და 10 თვე გაგრძელდება.

შეხვედრას ადგილობრივი თვითმმართველობის, სამოქალაქო სექტორის წარმომადგენლები და დაინტერესბული მოქალაქეები დაესწრნენ.