არასამთავრობო ორგანიზაცია „თანაზიარის“ მიერ გამართულ მრგვალ მაგიდაზე, სადაც მოწვეული მერობის კანდიდატებისთვის მოქალაქეთა სურვილები უნდა გაეცნოთ, მხოლოდ „პატრიოტთა ალიანსის“ მერობის კანდიდატი გოგიტა ბიგვავა მივიდა.

ორგანიზაციის ხელმძღვანელის ხათუნა ბეჭვაიას თქმით, შეხვედრის მიზანი პროექტის ფარგლებში მოსახლეობაში შეგროვებული მესიჯების მათთვის გაცნობა იყო.

„მოსახლეობა მესიჯებს უგზავნიდა კანდიდატებს, თუ როგორი მერი უნდათ. ამაზე უნდა ყოფილიყო დღეს საუბარი, თუმცა, რადგან ისინი ადგილზე არ გამოცხადნენ. ჩვენ ამ გზავნილებს საკუთარ შტაბებში მივაწვდით, რათა მომავალმა მერმა ნახოს რა სურვილები გაუგზავნა მათ წინასწაარჩევნო პერიოდში საზოგადოებამ და გაითვალისწინონ მომავალი მუშაობის პერიოდში“, - აღნიშნა ბეჭვაიამ.

შეხვედრას დომენტი (ზვიად) სიჭინავას საარჩევნო შტაბისა და „ქართული ოცნების“ მერობის კანდიდატი ლაშა გოგიას შტაბის წარმომადგენლებიც დაესწრნენ. მათ კანდიდატების ღონისძიებას არ დასწრების მიზეზად მოუცლელობა დაასახელეს. იგივე მიზეზი უთხრეს რადიო „ათინათს“ „ერთიან ნაციონალურ მოძრაობაშიც“.

რაც შეეხება „ევროპულ საქართველოს“, პარტიაში აცხადებენ, რომ მსგავს შეხვედრაზე მოსაწვევად პარტიის პრესსამსახურს უნდა მიმართონ.

„როდესაც მოსაწვევი მოიტანეს შტაბში, ადგილზე არცერთი პასუხიმგებელი პირი არ იმყოფებოდა. შესაბამისად, გვიან გავიგეთ ამ შეხვედრის შესახებ, თორემ აუცილებლად მივიდოდით“, - უთხრა რადიო „ათინათს“ ბათლომე შელიამ.



შეხვედრაზე, რომელსაც არასამთავრობო ორგანიზაციების წარმომადგენლებიც დაესწრნენ, კამათი აზიურ ფაროსანას მიერ მიყენებული ზიანისთვის კომპენსაციების თემასა და მუნიციპალიტეტების გაერთიანების საკითხს მოჰყვა. ზვიად სიჭინავას საარჩევნო შტაბის წარმომადგენლის დავით ქანთარიას კითხვაზე, როგორ აპირებს ადგილობრივი ხელისუფლება პრობლემის მოგვარებს, მუნიციპალიტეტის საკრებულოს თავმჯდომარემ მაიზერ ნანავამ უპასუხა, რომ კომეპნსაციების გაცემით საკითხი არ გადაწყდება. რაც შეეხება თვითმმართველობის რეფორმას, მუნიციპალიტეტების გაერთიანება ძლიერი თვითმმართველობის არქონას არ ნიშნავს.

შეხვედრა „თანაზიარის“ წინასაარჩევნო პროექტის ფარგლებში გაიმართა.