აფხაზეთში პენსიები ამ ეტაპზე არ გაიზრდება, რადგან პენსიონერების რაოდენობა დასაქმებულებისას სჭარბობს, ამის შესახებ ადგილობრივი  ტელევიზიის პრესცენტრში გამართულ შეხვედრაზე დე ფაქტო რესპუბლიკის შრომის, დასაქმებისა და სოციალური უზრუნველყოფის მინისტრმა რუსლან ადჟბამ განაცახადა.

მისი ცნობით, ამჟამად აფხაზეთში 50 ათასზე მეტი პენსიონერია, მათგან 36 ათასი ასაკობრივ პენსიას (500 რუბლი) იღებს, ხოლო დასაქმებულთა რაოდენობა 42 ათასს შეადგენს. მისივე ცნობით, „ადგილი აქვს შემოსავლების დამალვას, შესაბამისად, მოქალაქეებს საპენსიო ფონდში არ შეაქვთ გადასახადები. ასევე, ამ სქემიდან ამოვარდნილები არიან სოფლის მცხოვრებლები, რომლებიც არანაირ გადასახადს არ იხდიან“. ადჟბას თქმით, ამ ეტაპზე მუშავდება საპენსიო უზრუნველყოფის ახალი კონცეფცია, რომელიც სავარაუდოდ, რამდენიმე წელიწადში ამოქმედდება.

სოციალურ პროგრამებზე საუბრისას აღინიშნა, რომ 2017 წლიდან, გალის, ტყვარჩელის და ოჩამჩირის რაიონებში გახსნილია შშმ ბავშვების განვითარების სამი ცენტრი. გარდა ამისა, არსებობს სოციალური პროგრამა - „სახლი - ინტერნატი“ ხანდაზმულებისთვის, რომელიც 53 ადამიანზეა გათვლილი. ასევე, უკვე წელიწადნახევარია მოქმედებს პროგრამები, რომლებსაც იუნისეფი ახორციელებს, რომლის ფარგლებშიც, საერთო ჯამში, 420-ზე მეტ ბავშვს ეწევა იურიდიული და საკონსულტაციო დახმარება.