ხაიშში ადგილობრივებსა და რეგიონული მართვის განყოფილების ხელმძღვანელს სოზარ სუბარს შორის მოლაპარაკებები დასრულდა. ადგილობრივების ინფორმაციით, შეხვედრაზე გადაწყდა, რომ ისინი ხაიშისა და ჭუბერის განვიარების გზებსა და საკუთარ ხედვებს ჩამოაყალიბებენ და სამთავრობო უწყებების წარმომადგენლებს დაახვედრებენ, რომლებიც ხაიშში 10 დღეში ჩავლენ.

"სპეცრაზმის და პოლიციის ამ ფორმით შემოსვლა იყო აბუჩად აგდება. გაიგო ყველამ, რა არის ჩვენი საარსებო წყარო, რომელსაც გვიბლოკავენ, მათ შორის, მათ, ვინს სანქციებს გვიდგენს. კი ბატონო, აკრძალონ ხე-ტყის ჭრა და მოგვცენ სამუშაო ადგილები, განვითარების სხვა საშუალებები და გზები. ხაიშში ველოდებით რამდენიმე მინისტრსა და სხვა უწყებების წარმომადგენლებს და მათ გადავცემთ ჩვენს მოსაზრებებსა და ხედვებს. აქ კიდევ ბევრი სხვა პრობლემებაცაა და თუ ვერ მოერგებიან ხალხს, წინა ხელისუფლების გზას მოერგებიან თავად. სამწუხაროდ, ყველაფერი ცენტრში წყდება და არა რეგიონში", - უთხრა რადიო "ათინათს" ერთ-ერთმა ადგილობრივმა გარი ჩხვიმიანმა.

ხაიშში მოლაპარაკებებს დღეს მაჟორიტარი დეპუტატი ვიქტორ ჯაფარიძეც დაესწრო.

ხაიშში ვითარება მას შემდეგ დაიძაბა, რაც სოფელში ფინანსური პოლიციის წარმომადგენლები და სპეცრაზმი შევიდა. ხაიშელებმა და ჭუბერელებმა სვანეთისკენ მიმავალი საავტომობილო გზა გადაკეტეს და ითხოვდნენ, რომ ტერიტორია დაეტოვებინათ. ისინი ამბობდნენ, რომ ადგილობრივები უკანონოს არაფერს სჩადიან და ხე-ტყის მოპოვება მათი ერთადერთი შემოსავალია. სვანები მთავრობას განვითარების სხვა გზების მოძიებას სთხოვენ. ფინანსთაა სამინისტროს საგამოძიებო სამსახურში კი ამბობდნენ, რომ საქმე ხე-ტყის უკანონო მოპოვების ფაქტებს ეხებოდა. საგამოძიებო უწყებაში ბრიფინგზე განაცხადეს, რომ ადგილობრივებმა ხელჯოხებითა და ქვებით მათი ავტომობილი დააზიანეს, სპეცრაზმი კი მათი უსაფრთხოებისა და საგამოძიებო მოქმედებების ჩასატარებლად იყო მობილიზებული. საბოლოოდ, ადგილზე სუბარის ჩასვლის შემდეგ მოლაპარაკებებით გადაწყდა, რომ ფინანსური პოლიცია და სპეცრაზმი სოფელს დატოვებდა და საავტომობილო გზაც გაიხსნა.

ამავე თემაზე:

სოზარ სუბარი ხაიშის მოსახელობას კვლავ შეხვდება