სამეგრელო-ზემო სვანეთის გუბერნატორის კონსულტანტის ლევან წულაიას ინფორმაციით, რეგიონის 9-ვე მუნიციპალიტეტი ახალ ააიპ-ის ერთობლივად დააფუძნებს. წულაიამ რადიო „ათინათს“ უთხრა, რომ ააიპ-ის მეშვეობით მუნიციპალიტეტები შეეცდებიან, უზრუნველყონ ტურიზმის განვითარება და რეგიონის ბრენდირება. მისივე თქმით, ააიპ-ის დამფუძნებლები იქნებიან მუნიციპალიტეტების მერები, სამეთვალყურეო საბჭოს შემადგენლობაში კი კერძო სექტორის, არასამთავრობოების, კომპანიებისა და ბიზნესის წარმომადგნლები შევლენ. წულაიას ცნობით, აღნიშნული ააიპ-ი დანიშნულების ადგილის მართვის ორგანიზაციის სამართლებრივი ფორმა იქნება, რომლის დაფუძნებასაც მიმდინარე წლის დეკემბერში ჩაეყარა საფუძველი. ამასთან, წულაია ამბობს, რომ გუბერნიამ USAID-თან და ტურიზმის ეროვნულ ადმინისტრაციასთან ერთად გარკვეული პროექტი და რეკომენდაციები შეიმუშავა, რომელიც მუნიციპალიტეტებს მიეწოდა, გადაწყვეტილებას კი მერიის წარმომადგენლები მიიღებენ.

„9-ვე მუნიციპალიტეტმა მიიღო გადაწყვეტილება, დააფუძნოს საერთო ააიპ, რომელიც მიხედავს ტურიზმის განვითარებას, რეგიონის ბრენდირებას, უნიკალური ტურისტული პროდუქტების შემუშავებას. რაც შეეხება დაფინანსებას, როგორც ვიცი, საუბარია, დაახლოებით, 30 000 ლარზე თითო მუნიციპალიტეტიდან, რომ საერთო თანაბარი ფინანსური კონტრიბუცია მიიღონ. თუმცა, შემიძლია გითხრათ, რომ პირველი წელი იქნება საპილოტე და ამაში კერძო სექტორის მონაწილეობა უნდა გაიზარდოს, შესაბამისად, ბიუჯეტიც უფრო კერძო სექტორიდან იქნება წამოღებული“, - გვითხრა წულაიამ.

რაც შეეხება ააიპ-ის ადგილმდებარეობას, წულაიას ინფორმაციით, მისი მისამართი ზუგდიდში იქნება. ამასთან, ის განმარტავს, რომ ააიპ-ის ხელმძღვანელი კონკურსის წესით შეირჩევა, მანამდე კი დროებითი მმართველი ეყოლება, რომელიც პირველ ეტაპზე, ბუღალტერთან, მარკეტინგისა და პიარის სპეციალისტებთან ერთად იმუშავებს.

„ ამ ოთხი ადამიანის ხელფასს გადაიხდიან საერთო ბიუჯეტიდან, რაც ექნება თვითონ დანიშნულების ადგილის მართვის ორგანიზაციას“, - აღნიშნა წულაიამ.

სამეგრელო-ზემო სვანეთში დანიშნულების ადგილის მართვის ორგანიზაცია (DMO) 11 დეკემბერს დაფუძნდა. მისი მიზანია სამეგრელო-ზემო სვანეთის რეგიონის ტურიზმის განვითარების მოდელის შექმნის ხელშეწყობა და მისი პოპულარიზაცია.

ამავე თემაზე:

სამეგრელო-ზემო სვანეთში დანიშნულების ადგილის მართვის ორგანიზაცია დაფუძნდა (ვიდეო)