სოციალურ ქსელში გავრცელდა ვიდეო, რომელზეც ჩანს, რომ ახალგაზრდა ქალი დუბაის ერთ-ერთი ყველაზე მაღალი ცათამბჯენის სახურავზე ლეზგინკას ცეკვავს. აღმოჩნდა, რომ ის აფხაზეთის მკვიდრი სანტა აშუბაა, წერს გამოცემა „აფსნი ლაიფი“.

აღსანიშნავია, რომ კადრები დეკემბრის შუა რიცხვებში, კვადროკოპტერი დრონით არის გადაღებული შვეულმფრენისთვის განკუთვნილ მოედანზე.

„საკმაოდ რთული იყო. მე და ჩემი ქმარი, რომელიც ვიდეო რგოლის ავტორია, სასტუმროს ერთ-ერთ თანამშრომელს მოველაპარაკეთ. მან კამერები გამორთო და სახურავზე აგვიყვანა. სულ 15 წუთი გვქონდა და გადავიღეთ ეს რგოლი რისკის ფასად“, - უთხრა მან გამოცემას.

2016 წლიდან სანტა აშუბა მეუღლის სამშობლოში ჩერქეზეთში ცხოვრობს, სადაც საბავშვო ქორეოგრაფიული ანსამბლი „დიოსკურია“ დააარსა. მასში 120 ბავშვია გაერთიანებული, რომელთაც ის კავკასიურ ცეკვებს ასწავლის.