ოჩამჩირის რაიონის სოფელ მოქვში მდებარე ღვთისმშობლის მიძინების სახელობის ტაძარი სასაწრაფო რეაბილიტაციას საჭიროებს. ამის შესახებ "აფხაზეთის წმინდა მიტროპოლიის“ წარმომედგენლებმა განაცხადეს, წერს „აბხაზია ინფორმი“.

მათი ინფორმაციით, მიმდინარე წლის 4 თებერვალს ტაძრის დათავლიერების შედეგად გამოვლინდა, რომ „აფხაზეთის კულტურული მემკვიდრეობის მარგალიტად მიჩნეული ნაგებობა ავარიულ მდგომარეობაშია. კერძოდ, დაზიანებულია გუმბათის როტონდის სახურავის ნაწილი, დარღვეულია ცენტრალური აფსიდის ქვის კედლის მთლიანობა (ჩრდილო - აღმოსავლეთით), ასევე ჩამონგრეულია წყალამრიდები, ფანჯრის ჩარჩოები, ტაძრის კედლებზე მოდებულია ხავსი და ობი, როგორც შიგნით, ასევე გარედან“, - აღნიშნულია განცხადებაში.

"აფხაზეთის წმინდა მიტროპოლია“ მოუწოდებს საზოგადოებას და კომპეტენტურ ორგანოებს შეისწავლონ მოქვის ტაძრის სავალალო მდგომარეობა და შეიმუშაონ კომპლექსური ღონისძიებები ისტორიულ - კულტურული ძეგლის გადასარჩენად.

ქართული ისტორიული წყაროების ცნობით, მოქვის ტაძარი აფხაზთა მეფე ლეონ III-მ (957-967 წწ.)ააშენა. იგი წარმოადგენს ჯვარ-გუმბათოვან ნაგებობას, რომელიც საუკუნეების განმავლობაში ლიტერატურულ-საგანმანათლებლო კერა იყო, სადაც მიმდინარეობდა ხელნაწერთა გამრავლება, ძველი ნუსხების განახლება. დღემდე მოღწეულია მოქვის წიგნთსაცავის ხელნაწერები, რომლებიც გვამცნობენ მოქველ მოღვაწეთა სახელებს. მოქვის სიძველეებიდან განსაკუთრებით მაღალი ღირებულება აქვს მოქვის ოთხთავს.