ყოფილ პატიმართა რესოციალიზაციის, ეკონომიკური მხარდაჭერის, დასაქმების ხელშეწყობისა და ოჯახის გაძლიერების მიზნით, საქართველოს იუსტიციის სამინისტროს საგრანტო პროგრამით, 34 ყოფილი პატიმრის ბიზნესიდეა დაფინანსდა, აქედან 13 სამეგრელოს რეგიონიდანაა. ისინი საკუთარი იდეის განხორციელებას შეძლებენ სხვადასხვა მიმართულებით, რომელთა შორისაა სოფლის მეურნეობა, მომსახურება, წარმოება და სხვა. საგრანტო კონკურსში გამარჯვებულ ბენეფიციარებს სამეგრელოს რეგიონში იუსტიციის სამინისტროს სსიპ „დანაშაულის პრევენციის ცენტრის“ დირექტორი ლადო ჯავახიშვილი და პროექტის პარტნიორი არასამთავრობო ორგანიზაციის - საქველმოქმედო ჰუმანიტარული ცენტრ „აფხაზეთის“ წარმომადგენლები შეხვდნენ. ლადო ჯავახიშვილის თქმით, საუკეთესო ბიზნესიდეის მქონე ყოფილი პატიმრები, მთელი ქვეყნის მასშტაბით, კონკურსის წესით შეირჩნენ. მათზე გაცემული თანხის რაოდენობა (2000-დან 5 000 ლარამდე) კი ბიზნესის სპეციფიკაზეა დამოკიდებული.

„ბენეფიციარებს გადაეცათ სხვადასხვა სახის ტექნიკა. გადაცემის პროცესი დაიწყო სამეგრელოს რეგიონიდან. საერთო ჯამში 34 ბენეფიციარი დაფინანსდა“, - თქვა ლადო ჯავხიშვილმა.

კონკურსის გამარჯვებული ბენეფიციარი ჭაბუკა გეთია, რომელსაც მანქანის დიაგნოსტიკური მოწყობილობა გადაეცა ამბობს, რომ აღნიშნული ტექნიკით შემოსავალის წყაროს გაზრდას და ბიზნესის განვითარებს შეძლებს.

იუსტიციის სამინისტრო საგრანტო პროექტს ბიზნესიდეების დაფინანსებისთვის 2013 წლიდან ახორციელებს. პროექტის მიზანია, ყოფილმა პატიმრებმა წამოიწყონ საკუთარი ბიზნესი, რაც მათ ეკონომიკურთან ერთად ფსიქოლოგიური პრობლემების დაძლევაში ეხმარება და  მინიმუმამდე ამცირებს განმეორებითი დანაშაულის ჩადენის რისკს, რაც თავის მხრივ უსაფრთხო გარემოს წინაპირობაა.